सिंगो गाउँपालिका प्रसूतिगृहविहीन हुँदा आठ सय गर्भवती समस्यामा





महोत्तरी जिल्लाको एउटा सिंगो गाउँपालिकामा प्रसूतिगृह (बर्थिङ सेन्टर) नहुँदा बिरामीलाई अन्यत्र लैजान कठिन भएको छ । जिल्लाको महोत्तरी गाउँपालिका प्रसूतिगृहविहीन भएकाले त्यहाँका गर्भवती महिलालाई सुरक्षित रूपमा बच्चा पाउन समस्या भएको हो ।

तीस हजारभन्दा बढी जनसंख्या रहेको त्यस गाउँपालिकामा अहिले करिब आठ सय महिला गर्भवती छन्, तर गाउँपालिकाभरि एउटा पनि प्रसूतिगृह नरहेको गाउँपालिकाका स्वास्थ्य सहसंयोजक सरोजकुमार झाले बताए ।

उनका अनुसार एउटा पनि प्रसूतिगृह नहुँदा त्यहाँका महिला जोखिमपूर्ण अवस्थामा बच्चा जन्माउन बाध्य छन् । पहिलेका तीन गाविस महोत्तरी, गोनरपुरा र डाम्हीमडै मिलेर नयाँ बनेको उक्त गाउँपालिकामा मात्र तीन स्वास्थ्य चौकी भए पनि प्रसूति गराउने व्यवस्था नभएकाले गर्भवती महिलालाई सदरमुकामस्थित जिल्ला अस्पताल वा जनकपुर अञ्चल अस्पताल जानुपर्ने बाध्यता रहेको वडा नम्बर ५ का महिला स्वास्थ्य स्वयंसेविका बेदनीदेवी महतोले बताइन् ।

उनका अनुसार दिउँसो बेथा लागेर प्रसूति हुने महिला समयमै सुविधासम्पन्न अस्पतालमा जान सक्ने, तर बेलुका र रातिको समयमा बेथा लाग्ने महिलाका लागि भने समस्या छ । उक्त गाउँपालिकाका अध्यक्ष सुनिलकुमार रायले चाँडै सुविधासम्पन्न प्रसूतिगृह निर्माण गर्ने र त्यसका लागि सम्बन्धित निकायबाट पहल भइरहेको बताए ।

उनले आफ्नो क्षेत्रभित्रका गर्भवती महिलालाई सुरक्षित रूपमा प्रसूति गराउन स्वास्थ्य चौकीका महिला स्वास्थ्यकर्मीलाई तालिमसमेत दिन थालिएको जानकारी दिए ।

प्रतिक्रिया