दक्षिण अफ्रिकाको पूर्वी क्षेत्रमा आएको बाढीमा परी कम्तीमा ५१ जनाको मृत्यु भएपछि राष्ट्रपति सिरिल रामाफोसाले स्थलगत अवलोकन गरेका छन् ।

दक्षिण अफ्रिकामा हालका दिनहरूका भारी वर्षाले सताएको र सोही कारण गत हप्ताबाट दक्षिण र पूर्वी भागहरू प्रभावित भएका छन् । लिबिया र सुडानमा जारी द्वन्द्वको विषयमा इजिप्टमा भएको सम्मेलनबाट फर्किएका रामाफोसाले यस बाढीबाट ज्यान गुमाएका परिवार र समुदायप्रति दुःख प्रकट गर्दै सरकारले पूर्ण सहयोग गर्ने बताए ।

यस बाढीबाट प्रभावित परिवारलाई सहयोग गर्न राष्ट्रपतिले सबैसँग आह्वान गरेका छन् । यस बाढी र पहिरोमा परी मंगलबारसम्म ३३ जनाको मृत्यु भएको थियो । तर, पहिरोमा पुरिएका व्यक्तिलाई निकाल्ने क्रममा सो संख्या ५१ पुगेको बताइएको छ ।

यस बाढीका कारण भवनहरू भत्किएका र विद्युत प्रसारण लाइनमा पनि समस्या आएको छ । सहयोग, उद्धारलगायत बाढी प्रभावित व्यक्तिहरूलाई सुरक्षित स्थानमा सार्न दक्षिण अफ्रिकी सेनालाई परिचालन गरिएको छ ।