आइतबार श्रीलङ्काका चर्च तथा होटलहरूमा भएको शृङ्खलाबद्ध विस्फोटनमा परी मृत्यु हुनेको संख्या २०७ नाघेको त्यहाँका अधिकारीहरूले बताएका छन् । श्रीलङ्कन प्रहरीका अनुसार अहिलेसम्म २०७ जनाको मृत्यु भइसकेको पुष्टि भएको छ भने यो संख्या अझै बढ्न सक्ने बताइएको छ ।
घटनामा करिब ५ सय बढी मानिसहरु घाइते भएको अधिकारीहरुले बताएका छन् । घटनामा परेर ज्यान गुमाउने मध्ये ३५ जना विदेशी समेत रहेको जनाइए पनि यसको यकिन विवरण भने आइसकेको छैन् ।
आइतबार बिहान श्रीलंकाको राजधानी कोलम्बोसहित विभिन्न शहरमा रहेका चर्च र होटलमा श्रृंखलाबद्ध विस्फोछन गराइएको थियो । बिहान कम्तीमा छ वटा विस्फोटन भएका थिए भने त्यसपछि थप दुई स्थानमा पनि विस्फोटन गराइएको उच्च अधिकारीहरुले जानकारी दिएका छन् ।
विस्फोटनबाट धेरैजसो चर्च ध्वस्त भएका छन्, कतिपयको छाना उडाइएको छ । नागरिकहरु त्रसित अवस्थामा छन् । घटनालगत्तै श्रीलङ्काका राष्ट्रपति मैत्रिपाला सिरिसेनाले राष्ट्रका नाममा सम्बोधन गर्दै देशवासीलाई शान्त रहन आग्रह गरेका थिए । उनले घटना फेरि दोहोरिन सक्ने भन्दै चनाखो रहन सबैलाई निर्देशन समेत दिएका छन् ।
यस आतंकवादी हमलापछि श्रीलङ्कामा देशभरि नै लागु हुनेगरी आइतबार साँझ ६ बजेदेखि सोमवार बिहान ६ बजेसम्मका लागि कर्फ्यू लगाइएको थियो ।
यसैबीच घटनामा संलग्न रहेको आरोपमा ८ जना संदिग्धलाई त्यहाँको प्रहरीले प्रकाउ गरेको छ । त्यहाँका रक्षामन्त्रीका अनुसार अधिकांश घटनाहरू आत्मघाती आक्रमण भएका र ती सबै एउटै समूहले गराएको हुन सक्ने बताइरहँदा घटनाको जिम्मा भने कसैले नलिएको अधिकारीहरुले जानकारी दिएका छन् ।
प्रतिक्रिया