६ वटा मधेसवादी दल एक भई बनेको राष्ट्रिय जनता पार्टी नेपाल शनिबारदेखि तेस्रो वर्ष प्रवेश गरेको छ । तेस्रो वार्षिकोत्सवको अवसर पारेर राजपा नेपालले राजधानीमा शुभकामना आदानप्रदान कार्यक्रम आयोजना गऱ्यो । कार्यक्रममा विभिन्न राजनीतिक दलका नेता तथा राजपाका कार्यकर्ता उपस्थित थिए ।

नेपाली कांग्रेसका सभापति शेरबहादुर देउवा, नयाँ शक्ति पार्टी नेपालका संयोजक डा बाबुराम भट्टराई, परराष्ट्रमन्त्री प्रदीपकुमार ज्ञवाली, राष्ट्रिय प्रजातन्त्र पार्टी संयुक्तका अध्यक्ष पशुपति शम्शेर जबरा, महान्यायाधिवक्ता अग्नि खरेललगायत विभिन्न दलका नेताले राजपाका नेतालाई बधाई तथा शुभकामना दिएका थिए ।

तत्कालीन महन्थ ठाकुर नेतृत्वको तराई मधेस लोकतान्त्रिक पार्टी, राजेन्द्र महतोको सद्भावना पार्टी, शरतसिंह भण्डारीको राष्ट्रिय मधेस समाजवादी पार्टी, महेन्द्र राय यादवको तराई मधेस सद्भावना पार्टी, अनिलकुमार झा नेतृत्वको नेपाल सद्भावना पार्टी र राजकिशोर यादवको मधेसी जनअधिकार फोरम (गणतान्त्रिक) बीच २०७४ साल वैशाख ७ गते एकीकरण भई राष्ट्रिय जनता पार्टी नेपाल गठन भएको हो ।

पार्टी एकीकरण भएको दुई वर्ष पूरा भए पनि राजपाले हालसम्म एकता अधिवेशन गर्न सकेको छैन । यही वैशाख ७, ८ र ९ गते महाधिवेश गर्ने घोषणा गरेको भए पनि बारा र पर्सा जिल्लामा आएको हावाहुरीबाट प्रभावित जनताको उद्धारमा खट्नुपर्ने भएकाले तोकिएको समयमै अधिवेशन गर्न नसकेको राजपाले स्पष्ट पारेको छ ।

राजपाका महासचिव केशव झाले यही वैशाख ८, ९ र १० गते पदाधिकारी बैठक बस्ने र सो बैठकले महाधिवेशनको मिति तय गर्ने जानकारी दिएका छन् । उनका अनुसार बैठकले असार मसान्तभित्रै महाधिवेशन सम्पन्न गर्नेगरी कार्य तालीका सार्वजनिक गर्नेछ ।

सङ्घीय समाजवादी फोरमसँग एकता गर्ने विषयमा छलफल चलिरहेको र एकीकरणका लागि दुई पटक पत्र आदानप्रदान भएको जानकारी दिँदै उनले दुई दलबीच अनौपचारिक छलफल भइरहेको र परिस्थिति अनुकूल हुँदै गएपछि दुई दलबीच गम्भीर वार्ता हुने दाबी गरे ।

pic: rss