विश्वकप क्रिकेट खेल्ने नेपालको सपना अधुरै





आगामी वर्ष दक्षिण अफ्रिकामा आयोजना हुने आईसीसी उन्नाइस वर्षमुनि (यू–१९) एकदिवसीय विश्वकप क्रिकेट खेल्ने नेपालको सपना अधुरो भएको छ ।

मलेसियामा जारी एसिया छनोटअन्तर्गत बिहीबार भएको खेलमा संयुक्त अरब इमिरेट्स (यूएई)ले ओमानलाई १० विकेटले पराजित गरेपछि नेपालको विश्वकप खेल्ने सपनामा पूर्णविराम लागेको हो । छनोट खेलमा सिंगापुरविरुद्धको पहिलो खेलबाट राम्रो शुरुआत गरेको नेपालका लागि यूएईविरुद्धको दोस्रो खेलमा व्यहोरेको हार नै विश्वकप खेल्न नपाउनुका प्रमुख कारण बन्न पुग्यो । वर्षाका कारण खेल सम्भव नभएपछि वकवर्थ नियमका आधारमा नेपाल एक रनको झिनो अन्तरले यूएईसँग पराजित भएको थियो । जसको नतिजाबाट नेपालको विश्वकप खेल्ने सपना अधुरो नै रह्यो ।

नेपालले पहिलो खेलमा सिंगापुरलाई २१७ रनको भारी अन्तरले पराजित गरेको थियो भने मलेसियालाई आठ तथा ओमनलाई १५० रनले पराजित गरेको थियो । जारी खेलमा नेपालले कुवेतलाई पराजित गरे पनि नेपाल विश्वकपमा सहभागिता जनाउन पाउने छैन । विश्वकपमा छनोट हुन नेपाललाई कुवेतविरुद्ध जित र यूएईको हार आवश्यकता रहेको थियो, तर यूएईको जितसँगै नेपालको विश्वकप खेल्ने सपना समाप्त भएको हो ।

उक्त छनोट प्रतियोगिताको शीर्ष एक टोलीले मात्र विश्वकपमा स्थान बनाउने प्रावधान छ । जसमा यूएई प्रवेश गर्न सफल भयो । यसअघि सातपटक विश्वकप खेलिसकेको नेपाल आठौँ पटक प्रवेशका लागि यूएईसँगको खेल घातक सावित भयो । जितसँगै यूएईले अब सन् २०२० मा दक्षिण अफ्रिकामा आयोजना हुने विश्वकपमा सहभागिता जनाउनेछ ।

प्रतिक्रिया