सप्तरीको अग्निसाई कृष्णश्रवण गाउँपालिकास्थित महुलीमा हात्तीको आक्रमणबाट घाइते एक महिलाको आज उद्धार गरिएको छ ।

पूर्व—पश्चिम राजमार्गदेखि दुई किलोमिटर उत्तर वन क्षेत्रको महुली खोलामा पहिचान खुल्न नसकेको अन्दाजी ४५ वर्षीया महिला हात्तीको आक्रमणबाट घाइते भएकी हुन् । वनमा घाँसदाउरा गर्नेले निजलाई घाइते अवस्थामा देखेपछि प्रहरीलाई खबर गरेका थिए । घाइते महिलालाई कोशी टप्पु वनजन्तु आरक्षबाट निस्केको हात्तीले आक्रमण गरेको स्थानीयवासीको भनाइ छ ।

वन क्षेत्रभित्र महिला घाइते भएको सूचना पाउनासाथ इलाका प्रहरी कार्यालय महुलीका प्रहरी नायब निरीक्षक रामबाबु यादवको नेतृत्वको टोलीले घाइतेलाई उद्धार गरी राजविराजस्थित गजेन्द्रनारयण सिंह सगरमाथा अञ्चल अस्पताल पठाएको स्थानीयवासी वृजमान तमाङले बताए । घाइते महिलाको दाहिने हात भाँचिएको र ढाडमा गम्भीर चोट लागेको प्रहरीले जनाएको छ ।