गत पुसमा थाइल्यान्डमा आयोजित १०औँ विश्व शारीरिक सुगठन च्याम्पियनशिपमा स्वर्ण पदक जितेर इतिहास रचेका नेपाली खेलाडी महेश्वर महर्जनलाई काव्य स्कुल नयाँबानेश्वरले नगदसहित ‘काव्य खेल सम्मान– २०७५’ प्रदान गरेको छ । महर्जनका कारण नेपालले शारीरिक सुगठन प्रतियोगितामा पहिलोपल्ट ७५ केजी तौल समूहमा स्वर्ण पदक जितेको थियो ।
जावलाखेलस्थित खेलमैदानमा आयोजित नवौँ काव्य खेल सप्ताह समापनको अवसरमा काव्य स्कुलले स्वर्णपदक विजेता महर्जनलाई नगद ५ हजारसहित ‘काव्य खेल सम्मान’बाट सम्मान गरेको हो । सो विद्यालयका संस्थापक प्रिन्सिपल नवराज बास्कोटा, निर्देशकहरू रिजन खड्का, सुनिलकुमार घर्ती र प्रेमराज अर्यालले पुष्पगुच्छा, खादा, प्रशंसापत्र तथा नगद दिएर सम्मान गरेका थिए । काव्य स्कुलले २ वर्षअघि नेपाली क्रिकेट टोलीका कप्तान पारस खड्कालाई पनि ‘काव्य खेल सम्मान’ प्रदान गरेको थियो ।
नवौँ काव्य खेल सप्ताह समापनको अवसरमा स्वर्ण विजेता महर्जनको सम्मानमा काव्य स्कुलका विद्यार्थी कोसिस, सुमन, म्याक्स, धीरेन्द्र्र, प्रसन्न, निश्चल, दीक्षान्त, जोनिश तथा कुशलले शारीरिक सुगठन प्रस्तुत गरेका थिए । यसैगरी विद्यार्थीले तेक्वान्दो, उसु, मार्चपास, नृत्यलगायत विविध खेलकुद प्रस्तुत गरेका थिए ।
कार्यक्रममा विद्यालयका संस्थापक प्रिन्सिपल नवराज बास्कोटाले काव्य स्कुलले खेलकुद र शिक्षालाई सँगसँगै अगाडि बढाइरहेको उल्लेख गर्दै ६ वर्षभन्दा साना बालबालिकालाई पढाइ होइन शारीरिक तथा बौद्धिक विकासको लागि खेलकुदमा सहभागी गराउनुुपर्नेमा जोड दिए ।
नवौँ काव्य खेल सप्ताहमा तेक्वान्दो, उसु, फुटसल, फुटबल, भलिबल, विभिन्न दूरीको रिले दौडलगायत दुई दर्जन प्रकारका खेलकुदहरू समावेश गरिएको थियो ।
प्रतिक्रिया