सालको पातका ‘भ्युअर्स’ दुई करोड

12 Shares

लोकदोहोरी गीत ‘सालको पातको टपरी हुनी’ म्युजिक भिडियो युट्युबमा दुई करोडपटक हेरिएको छ । गत असोजमा युट्युब च्यानलबाट सार्वजनिक भएको यो गीतले दर्शकबीच लोकप्रिय भएर चार महिना नपुग्दै दुई करोडभन्दा बढी दर्शक पाएको हो ।

नवराज पन्तको शब्द, वसन्त थापाको संगीत रहेको गीतमा कुलेन्द्र विश्वकर्मा र विष्णु माझीको स्वर छ । यिनै चार सर्जक, कलाकार मिलेर ०६८ मा ल्याएको लोकदोहोरी गीत ‘डाँडै फुर्के सल्लो’ पनि त्यसताका निकै चर्चित बनेको थियो ।

‘सालको पातको टपरी हुनी’ छोटो अवधिमा युट्युबमा धेरै हेरिएको लोकदोहोरी गीत हो । युट्युबबाहिर पनि गीतको लोकप्रियता उत्तिकै बढेको छ । रचना, स्वर र संगीत तीनै पक्ष स्रोताले निकै रुचाएका छन् । ‘म्युजिक भिडियो’ले युट्युबमा दर्शक तानेको छ । सरल शब्द, मौलिक भाखा र सुरिलो स्वर गीतको विशेषता हो । ‘उत्साहित छौँ, राम्रो प्रतिक्रिया आएको छ,’ गायक विश्वकर्माले भने । गीत राम्रो बनेको लागे पनि यति धेरै चर्चा पाउला भनेर नसोचेको उनको भनाइ थियो । ‘शब्द, संगीत, स्वरसँगै अभिनय र भिडियो निर्देशन पनि उत्कृष्ट रहेकोले दर्शक स्रोताको मन जितेको छ,’ विश्वकर्माले भने ।

‘भिडियो’मा नायिका मरिष्का पोखरेलसँगै गायक विश्वकर्मा र संगीतकार थापाको अभिनय छ । निर्देशन शिव विकले गरेका छन् । ‘छोटो अवधिमै गीत करोड क्लबमा प्रवेश गऱ्यो,’ संगीतकार थापाले भने, ‘नेपाली लोकसंगीतका लागि यो सुखद खबर हो, नेपाली दर्शक स्रोतको मायाले हामी उत्साहित बनेका छौँ ।’

हाल अमेरिकामा रहेका गीतकार नवराज पन्तका अनुसार मानवीय प्रेम र सम्बन्धमा आउने उतारचढाव गीतको रचनागर्भ हो । ‘गीतमा प्रेममा सिर्जित अविश्वास र त्यसको भोगाइको कथा छ,’ पन्तले भने, ‘सबैले शब्दलाई रुचाउनुभएको छ, खुसी छु ।’

संगीतकार थापाले आफू बेलायत भ्रमणमा हुँदा नयाँ गीत मागेपछि पन्तले ‘सालको पातको टपरी’ लेखेका थिए । ‘कम्पनीमा काम गर्दै थिएँ, एक्कासि गीत फुऱ्यो,’ पन्तले भने, ‘कागजको चिर्कटोमा शब्द उतारेँ ।’ झ्याउरे लयमा ठेट शब्द र मन छुने स्वरले गीतको लोकप्रियता बढेको हो । अभ्यास डिजिटल म्युजिक प्रालिद्वारा निर्मित गीत ‘वसन्त थापा’ नामको युट्युब च्यानलबाट सार्वजनिक भएको थियो ।

एक लाख ‘सब्सक्राइबर’ (युट्युब च्यानलको समूह सदस्य) पुगेपछि उक्त च्यानलले ‘अर्वाड’समेत पाएको छ । ‘युट्युबबाट च्यानल भेरिफाइड भएको छ,’ संगीतकार थापाले भने, ‘युट्युबको व्यावसायिक प्रक्रियामा छिरेका छौँ ।’ गीत हेर्ने, मनपराउने, टिप्पणी, आदानप्रदान र सब्सक्राइब गर्नेको संख्याका आधारमा युट्युबमा गीतको चर्चा मापन हुन्छ । सोही आधारमा कलाकारले पैसा पाउँछन् । पैसा आउनका लागि तोकिएको संख्यामा हेरिनुपर्ने र सब्सक्राइबर (युट्युब च्यानलको समूह सदस्य) पुग्नुपर्ने प्रावधान छ । शुरुमा युट्युब एकाउन्ट परीक्षणमा रहने र ‘मोनिटाइज’ भएपछि मात्र पैसा आउने गरेको छ । श्रव्य क्यासेट, सीडी, सीआरबीटी हुँदै संगीत व्यवसाय अहिले युट्युबमा केन्द्रित छ । प्रविधिको फड्कोले संगीत बजारको स्वरूप बदलेको हो ।

रामबहादुर थापा (रासस)

12 Shares

प्रतिक्रिया