साल्ट ट्रेडिङ कर्पोरेसन लिमिटेड पोखराले चालू आर्थिक वर्षको पाँच महिनामा आठ करोड रुपैयाँको कारोबार गरेको छ । उक्त कार्यालयले सो अवधिमा खाद्य पदार्थ, खानेतेल, नुन र चिनीको बिक्री गरी सात करोड ५९ लाख मूल्यबराबरको कारोबार गरेको सो कार्यालयका प्रमुख सुरेशराज भण्डारीले जानकारी गराए ।
सोमध्ये सबैभन्दा धेरै नुनको कारोबार भएको छ । सो अवधिमा सात करोड ३२ लाख ११ हजार ९६५ मूल्यबराबरको ८९ हजार २८५ बोरा नुन बिक्री भएको छ । सोअन्तर्गत रु. ६ करोड २१ लाख ८३ हजार २९० मूल्यबराबरको ६७ हजार २२८ बोरा आयोनुन र रु एक करोड १० लाख २८ हजार ६७५ मूल्यबराबरको ढिकेनुन बिक्री गरेको छ ।
साल्ट ट्रेडिङ पोखराले डिलरको माध्यमबाट कास्की, तनहुँ, लमजुङ, स्याङ्जा र गोरखा जिल्लामा नुन आपूर्ति गर्दछ । उक्त कार्यालयले रु. १६ लाख ५६ हजार ३४२ मूल्यबराबरको रासायनिक मल बिक्री गरेको छ । यस्तै, रु. एक लाख तीन हजार ३१८ मूल्यबराबरको १५० बोरा चोकर र मैदा साथै रु. ८१ हजार मूल्यबराबरको पिठो बिक्री भएको छ । त्यस्तै, रु. चार लाख ६९ हजार ३०७ मूल्यबराबरको सूर्यमुखी तेल र चार हजार ४६० मूल्यबराबरको खाने तेल गरिएको हो । उक्त कार्यालयबाट रु. चार लाख नौ हजार २०३ मूल्यबराबरको १३६ बोरा चिनी पनि सो अवधिमा बिक्री भएको थियो ।
प्रतिक्रिया