क्रोएसिया राष्ट्रिय फुटबल टिमका कप्तान लुका म्याड्रिचले फुटबलको चर्चित ‘बलोन डी’ अवार्ड जितेका छन् । लुकाले यो अवार्ड जित्न रोनाल्डो, ग्रिजमेन र एम्बाप्पेलाई पछि पारेका थिए । यो अवार्डको दौडमा रोनाल्डो दोस्रो, ग्रिजमेन तेस्रो, एम्बाप्पे चौथो र मेसी पाँचौँ स्थानमा रहेका थिए ।

‘बलोन डी’ जितेपछि प्रसन्न मुद्रामा देखिएका लुकाले यो आफ्नो लागि गर्वको कुरा भएको बताए । ‘जब म बच्चा थिएँ, ठूलो भएपछि ठूलो क्लबबाट खेलेर ‘बलोन डी’ सपना देखेको थिएँ, अहिले त्यो सपना पूरा भएको छ, ज्यादै खुसी छु,’ लुकाले भनेका छन् ।

लुका यो अवार्ड जित्ने पहिलो क्रोएसियाली खेलाडी हुन् । लुकाले यो अवार्ड जितेपछि पछिल्लो दश वर्षको रेकर्ड पनि तोडिएको छ । पछिल्लो दश वर्षमा मेसी र रोनाल्डोबीचमै यो अवार्ड सीमित बनेको थियो । मेसी र रोनाल्डोले यो अवार्ड पाँच–पाँचपटक जितिसकेका छन् ।

मिडफिल्डर लुका रियल म्याड्रिडबाट खेल्दै आएका छन् । लुकाले अहिलेसम्म अन्तर्राष्ट्रिय र क्लब फुटबलवाट ८८ गोल गरेका छन् । ३३ वर्षीय लुकाले गत वर्ष सम्पन्न विश्वकपमा आफ्नो कप्तानीमा क्रोएसियालाई फाइनलसम्म पु¥याउन महत्वपूर्ण भूमिका निभाएका थिए । त्यस्तै, च्याम्पियन लिगमा आफ्नो क्लब रियल म्याड्रिडलाई उपाधि जिताउन पनि लुकाको महत्वपूर्ण योगदान रहेको थियो ।