युथ एथलिट्स कोचिङ क्याम्प सम्पन्न

2 Shares

जुनियर खेलाडीमा रहेको प्रतिभालाई अझ स्तरवृद्धि गर्ने उद्देश्यले राष्ट्रिय खेलकुद परिषद्अन्तर्गत नेपाल खेलकुद विज्ञान प्रतिष्ठान (सान) द्वारा सञ्चालित युथ एथलिट्स कोचिङ क्याम्प सम्पन्न भएको छ ।

क्याम्पमा २०७२, २०७३ र २०७४ सालमा राखेपले आयोजना गरेको केन्द्रीय राष्ट्रपति रनिङ सिल्ड खेलकुद प्रतियोगिताको व्यक्तिगत स्पर्धामा पहिलो भएका ७२ खेलाडी सहभागी थिए । तेक्वान्दो, कराते, उसु र एथलेटिक्सको आ–आफ्नो स्पर्धामा पहिलो भएका खेलाडीलाई सम्बन्धित खेलका प्रशिक्षकले १० दिनसम्म उपत्यकामा प्रशिक्षण दिएका थिए ।

कराते खेलाडीलाई गंगाराम महर्जन र कुशल श्रेष्ठ, तेक्वान्दोलाई नवीनकुमार श्रेष्ठ र हीरा थापा, एथलेटिक्सलाई चन्द्र गुरुङ, धनीराम चौधरी, राकेश बज्राचार्य र पद्मा चौधरी तथा उसुलाई गोपाल श्रेष्ठ र प्रकाश महर्जनले प्रशिक्षण दिएका थिए ।

प्रशिक्षणमा सहभागी चारै खेलका एक–एक पुरुष–महिला उत्कृष्ट खेलाडी छनोट गरी समापनकै अवसरमा नगदबाट पुरस्कृत गरिएको थियो । करातेको पुरुषमा अनिश लामा र महिलामा विमला नेपाली तथा उसुको पुरुषमा प्रवीण लामा र महिलामा अस्मिता श्रेष्ठ उत्कृष्ट चुनिए । त्यस्तै तेक्वान्दोको पुरुषमा शैलेश गिरी र महिलामा आयशा लामा तथा एथलेटिक्सको पुरुषमा विकास खाण ठकुरी र महिलामा जयरानी थारू उत्कृष्ट घोषित भए । उत्कृष्ट सबैले जनही तीन हजार नगद पुरस्कार प्राप्त गरे ।

सहभागीलाई राखेपका कोषाध्यक्ष सैलेश कर्माचार्य, सानका निर्देशक नवीन उप्रेती, राष्ट्रिय टिम तयारीका निर्देशक अर्जुन विकलगायतले प्रमाणपत्र प्रदान गरे ।

2 Shares

प्रतिक्रिया