क्यामरुनको अंग्रेजीभाषी बसोवास गर्ने क्षेत्रबाट ७९ विद्यार्थी अपहरित भएका छन् ।

उक्त क्षेत्रलाई क्यामरुनबाट छुट्याउन संघर्ष गर्दै आएको समूहले विद्यार्थीलाई अपहरण गरेको सरकारी अधिकारीले जनाएका छन् । विद्रोहीले यसबारे अझै प्रतिक्रिया जनाइसकेको छैन ।

विद्यालय सञ्चालन भइरहेको समय विद्रोहीको एक सशस्त्र समूह पे्रस्बिटरियन माध्यमिक विद्यालय, वामेडामा प्रवेश गरी विद्यालयका प्रिन्सिपल, एक शिक्षक र बसचालकलाई समेत विद्यार्थीसँगै लगेको विद्यालय स्रोतले पुष्टि गरेको छ । उक्त क्षेत्र क्यामरुनको उत्तरपश्चिममा पर्छ ।

क्यामरुनमा हुँदै आएको १३ महिने अशान्तिका कारण भएको यो घटना अहिलेसम्मको सबैभन्दा ठूलो घटना हो । क्यामरुनमा अधिकांश फ्रेन्चभाषी रहेका भएपनि उक्त क्षेत्रमा अंग्रेजी भाषालाई मातृभाषाका रूपमा मानिदै आएको छ ।

क्यामरुनमा विगत ३५ वर्षदेखि राजनीतिक नेतृत्वमा रहेका ८५ वर्षीय राष्ट्रपति पाउल बिया गत अक्टोबरमा भएको निर्वाचनबाट सातौँ कार्यकालका लागि चुनिएको केही समयमा नै यो घटना भएको हो । यद्यपि निर्वाचन परिणाप्रति विपक्षीले धाँधली भएको बताउँदै असन्तुष्टि जनाउँदै आएका छन्
।
निर्वाचनमा बियाले ७१.३ प्रतिशत मत प्राप्त गरी जितेको दाबी गरिए पनि निर्वाचनमा सरकारी अधिकारीहरूले नै हुलदंगा मच्चाएर निम्न संख्यामा सहभागिता भएको विपक्षीको आरोप राष्ट्रपतिमाथि छ ।

क्यामरुनमा दुई करोड २० लाख अंग्र्रेजीभाषी नागरिक छन् र अल्पसंख्यक उनीहरूले आफ्नो भूभागलाई स्वतन्त्र गरिनुपर्ने बताउँदै आएका छन् । विश्व युद्धपूर्व क्यामरुन जर्मनीको कोलोनीका रूपमा रहेकोमा विश्वयुद्धपछि बेलायत र जर्मनीको अधीनमा गएको थियो ।

सन् २०१६ मा स्वतन्त्रताका लागि आवाज उठाए पनि अंग्रेजीभाषीलाई बियाले राज्यशक्तिको बलमा दबाएका थिए । सन् २०१७ को अक्टोबर १ मा एङ्लोफोन समुदायले देशको उत्तरपश्चिमी तथा दक्षिण पश्चिमी क्षेत्रलाई अम्बाजोनिया गणतन्त्रका रूपमा घोषणा गरेका थिए तर यसलाई कुनै पनि राष्ट्रले मान्यता दिएको छैन ।

क्यारुनमा भएका हिंसात्मक आन्दोलनमा परी चार सय नागरिकको मृत्यु भएको छ भने १७५ सुरक्षाकर्मीले ज्यान गुमाएका छन् ।