भारतमा ‘कमेडी किङ’का नामले परिचित कपिल शर्मा पुनः कमेडियन शो लिएर आउन लागेको जानकारी प्राप्त भएको छ । कपिलको उक्त शो आगामी अक्टुबरदेखि सोनी टीभीमा प्रसारण हुनेछ ।

यसको तयारीको लागि अहिले कपिल जुटिसकेको स्रोतले जनाएको छ । विभिन्न विवादका कारण लामो समयदेखि टीभीमा नदेखिएका कपिलले अहिले आफ्नो फोकस शो र स्वास्थ्यमा गरेको पनि स्रोतले बताएको छ । लामो समयदेखि फुर्सदिला बनेका कपिल अहिले निकै मोटाउनुको साथै उनको तौल पनि निकै बढेको छ । अहिले उनले आफ्नो तौल घटाउन ट्रेनरसमेत राखेका छन् ।

विवादास्पद कार्य र अभिव्यक्तिका कारण निकै आलोचित बन्न पुगेका कपिलको त्यसपछि लोकप्रियता निकै घटेको थियो । कपिलले केही महिना पहिले नयाँ कमेडी शो लिएर आए पनि त्यो दुई शृंखलामै बन्द भएको थियो । त्यसपछि गुप्तवास बसेका कपिलले उनका लाखौँ फ्यानको अनुरोधमा पुनः कमेडियन शो लिएर आउने निर्णय गरेका हुन् ।

त्यसका लागि कपिलले आफ्नो पुरानो लाइफमा निकै फेरबदल गरेको पनि जानकारी प्राप्त भएको छ । कपिल यतिबेला कुनै पनि विवादमा पर्न चाहँदैनन्, जसको प्रभाव उनको व्यक्तिगत जीवन, करिअर र शो मा परोस् । त्यसका लागि कपिलले सोसल मिडियाबाट आफूलाई निकै टाढा राखेका छन् ।

एउटा कमेडी शो गरेको एक करोड लिने कपिललाई अब दुई महिनापछि पुनः टीभीको पर्दामा देख्न पाइने भएको छ । कपिल पुनः टीभीको पर्दामा देखिने भएपछि अहिले उनका फ्यानहरू निकै खुसी भएका छन् । सोनी टीभीले पनि कपिलको स्टारडमलाई मध्यनजर गर्दै तुरुन्तै काम शुरु गर्न भनेको छ ।