गएरातिदेखि परेको अविरल वर्षाको पानीले उचित निकास नपाउँदा भक्तपुरका अधिकांश बस्ती डुबानमा परेका छन् । भक्तपुरका चारवटै नगरपालिकाका जलमग्न भएपछि स्थानीय वासिन्दा डुबानको मारमा परेका हुन् ।

अविरल वर्षासँगै भक्तपुरको चाँगुनारायण नगरपालिका ७ मझुवा टोलमा गएको पहिरोले घर पुर्दा एकै परिवारका तीनजनाको मृत्यु भएको छ । राति सुतिरहेको बेला खसेको पहिरोले च्यापिएर हजुरबुबा, हजुरआमा र नातिनीको मृत्यु भएको हो ।

भक्तपुरका प्रमुख जिल्ला अधिकारी नारायणप्रसाद भट्टका अनुसार मृत्यु हुनेमा ६९ वर्षीय हीरा लामा, उनकी श्रीमती ६२ वर्षीया पानमाया लामा र उनीहरूकी तीन वर्षीया नातिनी सम्पदा लामा रहेका छन् । उनीहरू भूकम्पपीडित हुन् । उनीहरू बस्दै आएको अस्थायी टहरो भत्किएर च्यापिएका थिए ।

हनुमन्ते खोलाको बाढीका कारण भक्तपुरका राधेराधे, जगाती, मध्यपुर ठिमी, सल्लाघारी, सिर्जनानगर, हनुमानघाटलगायतका क्षेत्र जलमग्न छन् ।

दुवाकोट, राधेराधे–निकोसेरा सडक, लिवाली, चाँगुनारायण इँटाभट्टाको तल्लो बेल्ट, ब्रह्मायणी, नगरकोट जाने नयाँबाटोलगायतका क्षेत्र पनि जलमग्न भएका कारण ती क्षेत्रमा चल्ने सवारीसाधन बिहानैदेखि अवरुद्ध भएका छन् ।

सिद्धि अस्पताल क्षेत्र पनि डुबानमा परेको छ । त्यहाँको एउटा पुल बाढीले बगाएको छ । बाढीले बस्ती डुबेपछि यातायात ठप्प हुनुका साथै घर र पसलमा बाढी पसेपछि खाद्यान्न लत्ताकपडा भिजेका छन् । बाढीका कारण बजार, शिक्षण संस्था पनि खुलेका छैनन् ।

बाढीमा फसेकाहरूको उद्धारकार्य जारी छ । उनीहरूलाई नेपाली सेनाको टोलीले क्रेन र डुंगाको सहायताले बिहानैदेखि उद्धार गरिरहेका भए पनि सबैतिर उनीहरूको सेना, प्रहरी र स्थानीय जनप्रतिनिधिको उपस्थिति छैन ।

बाढी र डुबानबाट के–कति क्षति भयो, यसको यकिन विवरण प्राप्त भइनसके पनि क्षतिको मूल्याङ्कन अर्बौँमा रहेको अनुमान छ । आफूले पालेका गाई, कुखुरा, बंगुर र घरका मालसामान बाढीले बगाउँदा स्थानीय स्तब्ध छन् । भक्तपुरको हनुमन्ते खोलाको बहाव फर्काएर जग्गा प्लटिङ गरेका कारण बाढीले निबास नपाउँदा ठिमीको नयाँबस्ती डुबानमा परेको हो ।

प्रधानमन्त्री केपी शर्मा ओलीको घर रहेको सूर्यविनायक २ मा पनि हनुमन्ते किनारका दुवैतिरका बस्ती डुबानमा परेका छन् । कौशलटारबाट बालकोट जाने बाटो अहिले अवरुद्ध छ । प्रत्येक वर्ष खोलाको किनारामा च्याप्दै बस्ती निर्माण हुने क्रम बढ्दा र प्रत्येक वर्षको वर्षाका बेला भक्तपुरवासीले यस्तै विपत्तिको सामना गर्दा पनि सम्बन्धित निकायले ध्यान नदिँदा स्थानीय आक्रोशित छन् ।