मनोज रिजाल, न्युयोर्क
सेप्टेम्बर ११, सन् २००१ को आतङ्ककारी हमलाबाट ध्वस्त भएको न्युयोर्क शहरको वल्र्ड ट्रेड सेन्टरको पुनर्निर्माणको क्रममा १, ४ र ७ नम्बर गगनचुम्बी भवनहरू केही वर्षअघि अस्तित्वमा आएसँगै ३ नम्बर गगनचुम्बी भवन पनि जुन ११, सन् २०१८ मा अस्तित्वमा आएको छ ।
एक भव्य समारोहबीच उद्घाटन गरिएको उक्त भवन ८० तलाको छ, १०७९ फिट अग्लो छ र अत्याधुनिक प्रविधिको प्रयोग गरेर बनाइएको छ ।
कार्यक्रमलाई सम्बोधन गर्दै न्युयोर्क राज्यका गभर्नर एन्ड्रयु कुमोले उक्त भवनको निर्माण सम्पन्न हुनु आतङ्ककारी हमलापछि पनि न्युयोर्कवासीको अटल आत्मविश्वास र दृढनिश्चयको प्रमाण रहेको बताए ।
‘यो भवनको निर्माणले न्युयोर्क शहर विश्वको आर्थिक राजधानी बनिरहोस् भन्ने हाम्रो प्रयास र कामनालाई सघाउ पुऱ्याउनेछ,’ गभर्नर कुमोले भने ।
यसैगरी, न्युयोर्क सिटीका मेयर बिल डी ब्लासियोले ठूलो शोक र सन्तापपश्चात् यो स्थितिसम्म आइपुगिएको उल्लेख गरे ।
‘हामी अझ धेरै साहसी, बलिया र विश्वको निम्ति अझ धेरै खुला शहरको रूपमा अगाडि आएका छौँ,’ मेयर ब्लासियोले भने ।
वल्र्ड ट्रेड सेन्टरका भवनहरूमध्ये सबैभन्दा अग्लो १ नम्बर भवन हो, जुन फ्रिडम टावरका नामले प्रख्यात छ । जमिनमुनिको पाँच तलासमेत गरेर यो १०९ तलाको छ र १७७६ फिट अग्लो छ ।
सेप्टेम्बर ११ को आतङ्ककारी हमलामा ध्वस्त भएका वल्र्ड ट्रेड सेन्टरका दुई समरूप भवनहरू (ट्विन टावर्स) अहिले अस्तित्वमा छैनन् । उक्त स्थानलाई खाली नै राखेर मृतकहरूको सम्झनामा स्मारकको रूपमा विकास गरिएको छ । उक्त हमलामा ३००० व्यक्तिको मृत्यु भएको थियो भने ६००० भन्दा बढी घाइते भएका थिए ।
(फोटो सौजन्य : जुलियन स्वोर्त, साना किरन : एफपीसी)
प्रतिक्रिया