‘बोक्सी’ आरोपमा कुटिएकी राधाले भनिन्, ‘अन्धोभक्त समाज सुधार्नेछु’

2 Shares

बोक्सीको झुटो आरोपमा मरणासन्न हुनेगरी कुटिएकी कैलाली घोडाघोडी–५ देउकलियाकी राधा आजबाट कक्षा ११ को परीक्षामा सामेल भएकी छिन् ।

गत फागुन २४ गते अन्तराष्ट्रिय नारी दिवसका दिन बोक्सी भगाउने भन्दै स्थानीय नक्कली भोलेबाबा भनिने रामबहादुर चौधरीबाट उनी कुटपिटमा परेकी थिइन् । राधाले आफू पढेर अन्धोभक्त समाजलाई परिवर्तन गरेर छाड्ने लक्ष्य लिएकी छिन् ।

घोडाघोडी बहुमुखी क्याम्पस, खुखड परीक्षा केन्द्रबाट राधा परीक्षामा सामेल भएको जिल्ला प्रहरी कार्यालय कैलालीका प्रहरी उपरिक्षक विनोद घिमिरेले जानकारी दिए ।

परिक्षामा सहभागि राधा चौधरीले विगतको घटना सम्झदै भनिन् –‘मलाई विनाकारण बोक्सी भन्दै कुटपिट गरेपछि केही समय पढाईमा ध्यान दिन सकिनँ । तर पनि परिक्षाका लागि भन्दै केही समयदेखि मेहेनत गरेर पढिरहेकी छु, अवश्य सफल हुन्छु ।’

उनलाई कुटपिटपछि प्रदेश सरकारका मुख्यमन्त्री, मन्त्रीहरु र स्थानिय सरकारका प्रमुखहरुले भेटेर थुप्रै आश्वासनहरु दिए पनि अहिलेसम्म कसैले केही सहयोग नगरेको राधाको गुनासो छ । सात समुन्द्रपारीबाट मनकारी जयन्ती राईले ५० हजार आर्थिक सहयोग गरेपछि आफूलाई केही सहज भएको राधाको भनाई छ ।

आफ्नो पढाईसँगै रुढीवादी र अन्धविश्वासले गाँजेको समाजलाई परिवर्तन गर्ने भन्दै राधाले अशिक्षा र अन्धोभक्त समाजका कारण आफू सावर्जनिक रुपमै अपहेलित हुनुपरेको गुनासो गरिन् ।

नारी दिवसका दिन देउकलियाकै रामबहादुर चौधरी उर्फ भोलेबाबा, आफूलाई पार्वती बताउने किस्मती चौधरी, स्मारिका चौधरी लगायतले बोक्सीको आरोप लगाएर राधामाथि निर्घात कुटपिटसहित यातना दिएका थिए ।

कुटपिट अभियुक्त रामबहादुर चौधरी र उनकी मुख्य सहयोगी १८ वर्षीया किस्मती चौधरी, २४ वर्षीया स्मारिका चौधरी, घोडाघोडी वडा नं ५ बस्ने ३४ वर्षीय वेदप्रसाद चौधरी, सोही ठाउँका ३३ वर्षीया चनकला चौधरी र ४१ वर्षीय सितारानी चौधरीलगायतलाई प्रहरीले पक्राउ गरेका थियो । हाल मुख्य अभियुक्त रामबहादुरसहितका व्यक्तिलाई पुर्पक्षका लागि थुनामा राखिएको छ ।

2 Shares

प्रतिक्रिया