दिनको आरम्भ अर्थात् सबेरै गरिएको खानपान या व्यवहारले हाम्रो दिनभरको स्वास्थ्यलाई प्रभावित तुल्याउँछ भन्ने कुरा वैज्ञानिकले सिद्ध गरिसकेका छन् । यदि सुरुवात ताजगीपूर्ण छ भने दिनभर स्फूर्ति कायम रहन्छ । कतिपय आदतले व्यक्तिलाई स्वस्थ राख्न मद्दत पुर्‍याउँछ भने कतिपय बानीले बिमार पारिदिने खतरा पनि उत्तिकै हुन्छ । तसर्थ, स्वास्थ्यमा गम्भीर असर पर्नुबाट जोगिन चाहनुहुन्छ भने केही यस्ता काम या व्यवहार छन्, जसलाई भुलेर पनि गर्न नहुने विज्ञजनको सुझाव छ । ती पाँच कर्म यस्ता छन्–
१. धुम्रपान : त्यसो त कुनै पनि बेला किन नहोस् धुम्रपान गर्नु स्वास्थ्यको लागि हानिकारक नै हुन्छ । खासगरी सुतेर बिहान उठ्नेबित्तिकै चुरोट पिउनुचाहिँ अत्यन्त खतर्नाक हुन सक्छ । क्यान्सरको सम्भावना यसले निकै बढाउने अनुसन्धानले देखाएको छ ।
२. मदिरा सेवन : कतिपय मानिस यस्ता पनि हुन्छन् जो आफ्नो बिहानीको आरम्भ नै मदिरा सेवनबाट गर्न रुचाउँछन् । तर, बिहानै रक्सी पिउनु स्वास्थ्यको हिसाबले निकै नोक्सानदायी हुन्छ ।
३. झगडा गर्नु : दिनको सुरुवात सकारात्मक हुनुपर्छ, उठ्नेबित्तिकै कुनै मामलालाई लिएर कसैसँग बाझाबाझ गर्दा दिनभर मुड खराब रहन्छ र मानसिक स्वास्थ्यका साथै त्यसले कामको परिणाम या सफलतामा पनि नकारात्मक असर पुर्‍याउँछ ।
४. मसलादार खाना : बिहानै अत्यधिक मसलादार खानेकुरा खान बन्देज नै गर्नुपर्छ । बिहानको समय जति हलुका तथा पौष्टिक खाना खायो त्यत्ति नै स्वस्थ रहन सकिन्छ ।
५. कफी पिउनु : संसारमा ज्याजसो मानिस बिहानको सुरुवात कफी पिएर गर्न चाहन्छन् । तर, विशेषज्ञहरूको कुरा मान्ने हो भने बिहान कफी पिउँदा कार्टिसोल (एक हर्मोनको नाम, जो प्रोटिन तथा कार्बोहाइड्रेडको मेटाबलिज्ममा सक्रिय भूमिका निभाउँछ) को लेवल बढाइदिन्छ । तसर्थ, कुनै काम आरम्भ गरिसकेपछि मात्र कफी पिउनु उचित हुन्छ ।