नेपाली काँग्रेसका सभापति शेरबहादुर देउवाले पदाधिकारी मनोनयनका लागि निर्वाचित पदाधिकारी तथा केन्द्रीय सदस्यहरुको बैठक बोलाएका छन् ।

शुक्रबार दिउँसो बोलाइएको बैठकमा पदाधिकारी मनोनयन गर्ने सभापति देउवाको तयारी रहेको उनको सचिवालयले जानकारी दिएको छ ।

देउवा निकट मानिएका नेता प्रकाशशरण महतले शुक्रबार बोलाइएको बैठकले पदाधिकारी मनोनयन गर्ने सम्भावना रहेको जानकारी दिए ।

काँग्रेस विधानमा निर्वाचित केन्द्रीय सदस्यबाट पदाधिकारी मनोनयनको प्रावधान रहेको छ । तर, वरिष्ठ नेता रामचन्द्र पौडेल तथा पूर्वमहामन्त्री कृष्णप्रसाद सिटौला पक्षधरले भने बैठक अगाडि रणनीति बनाउन छुट्टै भेला बोलाएको बुझिएको छ ।

संस्थापन इतरको भेलाले सभापतिले बोलाएको बैठकमा जाने वा नजानेबारे निर्णय लिने पौडेल निकट स्रोतले बताएको छ । पौडेल तथा सिटौला पक्षधरले विधानमा पदाधिकारी मनोनयन महाधिवेशनको दुई महिनामा गर्नुपर्ने प्रावधान रहेको भन्दै दुई वर्ष वितेको अवस्थामा मनोनयन गर्न नमिल्ने तर्क गर्दै आएका छन् ।

यसअघि बोलाइएको बैठकमा संस्थापत इतरले बैठक बहिष्कार गरेपछि आजका लागि बैठक समय तय गरिएको थियो ।