बदलिएको परिस्थतिअनुसार काम गर्न उर्जा, जलस्रोत तथा सिंचाईमन्त्री वर्षमान पुनले मातहतका कर्मचारीलाई निर्देशन दिएका छन् । जल उत्पन्न प्रकोप व्यवस्थापन विभागमा आयोजित विभागीय प्रस्तुतीकरण कार्यक्रमलाई विहिबार सम्बोधन गर्दै उर्जामन्त्री पुनले देश सङ्घीय संरचनामा गइसकेको भन्दै खटिएको ठाउँमा गएर काम गर्न कर्मचारीलाई निर्देशन दिएका हुन् ।
‘तपाईंहरुलाई कही अप्ठेरो परेको छ भने राज्यले हेर्छ, तर बदलिएको परिस्थितिलाई भने तपाईंहरुले आत्मसात गर्नुपर्छ, फिल्डमा गएर जनताको सेवामा लाग्नुहोस्’, मन्त्री पुनले सम्बोधनमा भने ।
मन्त्री पुनले आफु मन्त्री मात्र नभएर सबैको गार्जेन भएको बताए । उनले मन्त्रालयको लिडर र गार्जेनको रुपमा आफुले काम गर्ने तर आफुलाई पनि त्यसको बदलामा परिणामुखी काम चाहिने भएकाले कार्यक्षेत्रमा जिम्मेवार भएर लाग्न निर्देशन दिए । ‘म तपाईंहरुको साथी हो, गार्जेन पनि हो, तपाईंहरुलाई काम पुगेको छैन, अन्याय भएको छ भने म हेर्छु, काम पनि दिन्छु । तर मलाई तपाईंहरुले जिम्मा दिएअनुसारको परिणाम दिनुपर्छ ।’– मन्त्री पुनले भने ।
माओवादी केन्द्रका नेतासमेत रहेका मन्त्री पुनले सरकारी सम्पतीको दुरुपयोग नगर्न समेत चेतावनी दिए । ‘जनताको करबाट उठेको पैसाको दुरुपयोग भयो भने ठुलो अपराधसरह हुन्छ, त्यसैले तपाईंहरुले कम बजेटमा धेरै काम गर्ने गरी योजना बनाउनुहोस्,’ मन्त्री पुनले भने ।
मन्त्री पुनले उर्जा, जलस्रोत तथा सिंचाई मन्त्रालयले राम्रो काम गरेर देखाउने चुनौती भएको भन्दै त्यसका लागि कार्यक्षेत्रमा इमान्दारितापुर्वक लाग्न निर्देशन समेत दिए । उनले जनताले विकासको परिणाम खोजेको भन्दै त्यसका लागि खरो रुपमा उत्रनुपर्ने बताए ।
उनले जलवायु परिवर्तनको क्षेत्रमा ठुला–ठुला चुनौती रहेको भन्दै त्यसका लागि तयार रहेर बस्न समेत जल उत्पन्न प्रकोप व्यवस्थापन विभागका कर्मचारीलाई निर्देशन दिए ।
प्रतिक्रिया