एमाले नेतृत्वको वाम गठबन्धन सरकारका तर्फबाट भावी राष्ट्रपतिको उम्मेदवारको रुपमा राष्ट्रपति विद्यादेवी भण्डारीले आफ्नो उम्मेदवारी मनोनयन दर्ता गराउनुभएको छ । निर्वाचनको सम्पर्क कार्यालय रहेको अन्तर्राष्ट्रिय सम्मेलन केन्द्र, नयाँ बानेश्वरमा उहाँले उम्मेदवारी दर्ता गराउनुभएको हो ।
सत्तारुढ नेकपा (एमाले)को गए राति सम्पन्न स्थायी कमिटीको बैठकले राष्ट्रपतिमा भण्डारीको उम्मेदवारीलाई समर्थन गर्ने निर्णय गरेको थियो । निर्वाचन आयोगले यही फागुन २९ गते हुने राष्ट्रपतिको निर्वाचनका लागि आज अपराह्न ३ बजेसम्म मनोनयनका लागि समय तोकेको छ ।
यसैगरी प्रमुख प्रतिपक्षी नेपाली कांग्रेसले पनि राष्ट्रपतिमा आफ्नो उम्मेदवार खडा गर्ने भएको छ । राष्ट्रपतिको निर्वाचनमा लक्ष्मी राईलाई पार्टीका तर्फबाट उम्मेदवार बनाउने निर्णय आज बिहानको कांग्रेस कार्यसमिति बैठकले गरेको हो । बैठकले शहीद देवानसिंह राईकी सुपुत्री लक्ष्मी राईलाई राष्ट्रपतिको उम्मेदवार बनाउने निर्णय गरेको हो । लक्ष्मी राई कांग्रेसका पूर्व केन्द्रीय सदस्य एवं पूर्वसभासद् हुनुहुन्छ ।
नेपालको संविधानअनुसार संघीय संसद्को गठनपछि राष्ट्रपति, उपराष्ट्रपति, सभामुख र उपसभामुख तथा राष्ट्रियसभाका अध्यक्ष र उपाध्यक्षको निर्वाचन हुन लागेको छ । राष्ट्रपतिको निर्वाचन यही फागुन २९ गते हुने भएको छ ।
प्रतिक्रिया