गौतमबुद्ध अन्तर्राष्ट्रिय विमानस्थलमा निर्माणको जिम्मा पाएको चिनियाँ नर्थ वेस्ट सिभिल एभिएसन कम्पनीसँग विमानस्थल निर्माण परियोजनाले ठेक्का प्रक्रिया रद्ध गर्ने अन्तीम तयारी गरेको छ  । निर्माणको काममा सन्तोसजनक सुधार नभए ठेक्का रद्ध गर्नेसम्मको चेतावनीपत्र यस अगाडी पटक–पटक बुझाएको गौतमबुद्ध अन्तर्राष्ट्रिय विमानस्थल निर्माण परियोजनाका प्रमुख ओम शर्माले जानकारी दिएका छन् । उनीहरुको काममा कुनै सुधार आउन नसकेको र मासिक शुन्य दशमलव ५ प्रतिशत मात्र प्रगति रहेको शर्माले बताएका छन् । निर्माण कम्पनी के कारणले काम गर्न सकिरहेको छैन ? भनेर कारण देखाउन पटक–पटक पत्राचार गरे पनि उनीहरुले कुनै सुधारका काम गर्न नसकेको शर्माको भनाइ छ ।

काम चुस्त गतिमा अघि बढ्न नसकेकाले परियोजना विकल्पको रुपमा अर्काे टेण्डर प्रक्रियामा जाने तयारी गरेको परियोजना प्रमुख शर्माले जनाए । राष्ट्रिय गौरवको आयोजनाका रुपमा रहेको सो विमानस्थल निर्माणमा ढिलासुस्ती भएको जनगुनासो बढेसंगै विभिन्न क्षेत्रबाट परियोजनामाथि निश्चित समयभित्र निर्माण कार्य सक्न दबाव बढेको छ । चिनियाँ कम्पनीले आर्थिक कारण देखाउँदै काम गर्न नसकेको परियोजना प्रमुख शर्माले बताए ।

स्थानीय सप्लायर्सहरुलाई रकम भुक्तानी नगरेको बजारमा गुनासो बढी आएपछि उनीहरुसँग काम गर्न कोही ईच्छुक नहुँदा चिनियाँ कम्पनीले लेवर लगायत आवस्यक कच्चा पदार्थसमेत जुटाउन सकिरहेको छैन । मासिक ६ प्रतिशत काम सम्पन्न गर्नुपर्नेमा पछिल्लो समय चिनियाँ कम्पनीले शुन्य दशमलव ५ प्रतिशतका दरले मात्र काम गरिरहेको छ । दैनिक कम्तीमा ५ सय जना मजदुरले काम गरेको हुनुपर्ने र त्यही अनुपातमा हेबि इक्युमेन्ट सञ्चालनमा आएको हुनुपर्नेमा ३०-३५ जना मजदुरबाट मात्र काम भएको छ ।

विमानस्थल निर्माणका लागि सह कन्ट्याक्टरका रुपमा नेपाली कम्पनी नर्थ वेस्ट नेपाल इन्फ्रा प्रालिलाई दिएकोमा लेनदेनमा विवाद भएपछि चिनियाँ कम्पनी आफैले विमानस्थल निर्माणको काम विगत पाँच महिनादेखि गर्दै आएको छ । काम सुस्त भएपछि चिनियाँ कम्पनीसँग ठेक्का तोडन परियोजनाले डकुमेन्टहरु तयार गरिरहेको जनाएको छ । त्यसैगरी अर्को टेण्डर प्रक्रियाका लागि पनि डकुमेन्टहरु तयार भैरहेको परियोजना प्रमुख शर्माको भनाई रहेको छ ।

एसियाली विकास बैंक (एडीबी) को ऋण सहयोगमा सुरु भएको विमानस्थल निर्माणकार्य चिनियाँ कम्पनी नर्थ वेस्ट सिभिल एभिएसन एअरपोर्ट कन्स्ट्रक्सनले गर्दै आएको छ । ३१ डिसेम्बर २०१४ का दिन तत्कालिन प्रधानमन्त्री सुशील कोइरालाले विमानस्थल निर्माण कार्यको शिलान्यास गरेका थिए । चिनियाँ कम्पनीसँग २०१७ डिसेम्बर ३१ सम्म निर्माण कार्य सक्नुपर्ने सम्झौता भएको थियो । नर्थ वेस्ट कम्पनिले ६ अर्ब २२ करोड ५१ लाख २० हजार दुई सय २७ रुपैयाँमा निर्माण कार्यको जिम्मा लिएको हो । त्रिभुवन अन्तर्राष्ट्रिय विमानस्थलको विकल्पका रुपमा रहेको गौतमबुद्ध अन्तर्राष्ट्रिय विमानस्थल छिटो निर्माण कार्य सम्पन्न गर्न भैरहवाबासीले माग गरेका छन् ।