भरतपुर महानगरपालिकामा भएको पनर्मतदानको अन्तिम मतपरिणाम अनुसार रेणु ४३ हजार १२७ मत प्राप्त गरी विजयी भएकी छन् भने उनका निकटतम् प्रतिद्वन्द्वी नेकपा (एमाले)का देवीप्रसाद ज्ञवालीले ४२ हजार ९ सय २४ मत प्राप्त गरेका छन् । ज्ञवाली २०३ मतले रेणुभन्दा पछाडि परेका छन् । मतगणनाको सुरुआतदेखि नै अग्रता कायम गरेका ज्ञवाली वडा नं २० को मतगणना हुँदा पछाडि परेका थिए ।
यसैगरी, राप्रपाका प्रमुख पदका उम्मेदवार बद्री तिमिल्सिनाले ६ हजार ८४२ मत प्राप्त गरेका छन् भने भरतपुर महानगरपालिकाको उपप्रमुख पदमा नेपाली कांग्रेसकी पार्वती शाह विजयी भएकी छन् । उनलाई ४७ हजार १९७ मत प्राप्त भएको छ भने उनकी निकटतम् प्रतिद्वन्द्वी एमालेकी दिव्य शर्मा आचार्यले ३९ हजार ५२५ मत प्राप्त गरेकी छिन् । यस्तै, राप्रपाकी उपप्रमुख उम्मेदवार रिना गुरुङलाई ७ हजार २५२ मत प्राप्त भएको छ ।
अन्तिम मतपरिणाम अनुसार भरतपुर महानगरका २९ वडामध्ये १४ वडामा एमाले, १२ वडामा कांग्रेस र तीनवटा वडामा माओवादी केन्द्रका उम्मेदवार विजयी भएका छन् ।
पहिलो चरणमा भएको स्थानीय तह निर्वाचनअन्तर्गत भरतपुरमा वैशाख ३१ गते मतदान भएको थियो । २७ वटा वडाको मतगणना सकिएर १९ नं वडाको मतगणना भइरहँदा गत जेठ १४ गते मध्यरातमा दलका प्रतिनिधिले मतपत्र च्यातेका थिए जसका कारण भरतपुर–१९ मा शुक्रबार पुनः मतदान भएको थियो ।
एमालेले तत्काल मतगणना सुरु गर्न माग गरे पनि गठबन्धनमा रहेका नेपाली कांग्रेस र माओवादी केन्द्रले सो वडामा पुनः मतदान गराउन माग गरेका थिए । निर्वाचन आयोगले पनि मतदानकै पक्षमा निर्णय गरेको थियो । उक्त निर्णयका विरुद्ध सर्वोच्च अदालतमा मुद्दा परेको थियो । सर्वोच्च अदालतले पनि निर्वाचन आयोगकै निर्णय सदर गरेको थियो । अदालतबाट आदेश आएसँगै भरतपुर–१९ मा पुनः मतदान भएको हो ।
प्रतिक्रिया