सन् २०११ पछि सिरियामा जारी द्वन्द्वका कारण विस्थापित बनेकामध्ये झन्डै पाँच लाख सिरियाली जनता सन् २०१७ को सुरुदेखि हालसम्म घर फर्केका संयुक्त राष्ट्रसङ्घ शरणार्थी मामिला हेर्ने नियोगले जनाएको छ । एएफपीका अनुसार उनीहरू घर फर्किनुको अर्थ सिरिया पूर्णतया सुरक्षित भएको कारणले भन्दा द्वन्द्वमा छुटेका आफ्ना परिवारका सदस्य र सम्पत्ति खोजी गर्न पुगेका पाइएको छ । उनीहरूले घर फर्की आफ्नो घर र सम्पत्तिको रेखदेखपछि केही पुनः शरणार्थी शिविरमा फर्किने गरे पनि केहीले भने पुनः घरगाउँ नछोडेका पाइएको समाचारमा जनाइएको छ ।

राष्ट्रसङ्घीय उक्त नियोगले पछिल्ला केही महिना यता स्वदेश तथा विदेशमा बसोबास गर्दै आएका जनता घर फर्की आफ्ना परिवार र सम्पत्तिको हेरचाह गरेको भेटिएको बताएको छ । जनवरीपछि चार लाख ४० हजार विस्थापित सिरियाली अलेप्पो, हामा, होम्स र दमास्कस क्षेत्रमा फर्केको यूएनएचसीआरका प्रवक्ता आन्द्रेज महेसिकले जेनेभामा भेला भएका सञ्चारकर्मीसँगको कुराकानीमा बताउनुभयो ।

सो अवधिमा करिब ३१ हजार शरणार्थी छिमेकी देशबाट स्वदेश आएका छन् । यससँगै विदेश पलायन भएका करिब दुई लाख ६० हजार सिरियालीको सन् २०१५ पछि स्वदेश आगमन भएको उहाँले बताउनुभयो । उहाँले विदेशमा रहेका सिरियाली स्वदेश फर्कने वातावरण हुनु र फर्कन चाहनुले सकारात्मक सन्देश दिएको भए पनि लाखौैँ जनता विस्थापित भएको सिरियामा फर्कनेको सङ्ख्या नगन्य मात्र भएको बताउनुभयो ।

उहाँले सिरियामा हिंसात्मक गतिविधिमा कमी आएका कारण घर छोडी शरणार्थी बनेका जनता स्वदेश वा घर फर्किन थालेका भनिहाल्नु नहुने बताउनुभयो । सिरियामा गत छ वर्षको अवधिमा तीनलाख २० हजारभन्दा बढी व्यक्तिले ज्यान गुमाएका छन् भने आधा जनसङ्ख्या आन्तरिक वा बाह्यरूपमा विस्थापित बनेका संयुक्त राष्ट्रसङ्घको आँकडा रहेको छ । तर सिरियास्थित राष्ट्रसङ्घका विशेष प्रतिनिधि स्टेफेन दे मिस्टुराले यसैहप्ता सुरक्षा परिषद्मा मे ४ मा भएको शान्तिवार्तापछि हिंसा प्रष्ट महसुस गर्न सकिने गरी घटेको बताउनुभएको थियो ।