राजेन्द्र महतोले गरे ‘राष्ट्रिय मुक्ति क्रान्ति’ अभियानको घोषणा

राजेन्द्र महतोले गरे ‘राष्ट्रिय मुक्ति क्रान्ति’ अभियानको घोषणा


‘लोसपाले मुलुकलाई निकास दिन नसकेपछि पार्टी परित्याग गरेँ’ : महतो

लोकतान्त्रिक समाजवादी पार्टी (लोसपा) नेपालका वरिष्ठ नेता राजेन्द्र महतोले पार्टी परित्यागको घोषणा गरेका छन् ।

नेता महतोले काठमाडौंमा पत्रकार सम्मेलन गरी औपचारिकरुपमा सो पार्टी परित्यागको घोषणा गरेका हुन् । पार्टी परित्यागसँगै उनले ‘राष्ट्रिय मुक्ति क्रान्ति’ नामक अभियानको घोषणा पनि गरेका हुन् ।

केही समयदेखि लोसपा नेतृत्वसँग असन्तुष्ट रहँदै आएका नेता महतोले पत्रकार सम्मेलनमार्फत पार्टी परित्यागसहित औपचारिकरुपमा ‘राष्ट्रिय मुक्ति क्रान्ति’ नामक अभियानको घोषणा पनि गरेका छन् ।

नेता महतोले आफूले घोषणा गरेको अभियान, सङ्घर्ष र विद्रोहका रुपमा अगाडि बढ्ने जिकिर गरे । आफूले लोसपा परित्याग गरे पनि राष्ट्रिय मुक्ति क्रान्तिमार्फत सक्रिय रहने उनको भनाइ थियो ।

पार्टी परित्याग गर्नुपर्ने कारणबारे महतोले भने, ‘जुन आशा र अपेक्षाअनुसार हामीले लोसपाको विकास गर्न खोजेका थियौँ, त्यसरी सो पार्टीले मुलुकलाई निकास दिनसक्ने अवस्था देखिएन । मधेस र समग्र देशका नागरिकका अपेक्षाअनुसार सो पार्टीले काम गर्न सकेन । त्यसैले मैले पार्टी परित्याग गरेर नयाँ क्रान्तिको सुरुआत गरेको हो ।’

तस्बिर : रासस