माओवादी नेता पुरी सम्पत्ति शुद्धीकरण मुद्दामा दोषी ठहर

माओवादी नेता पुरी सम्पत्ति शुद्धीकरण मुद्दामा दोषी ठहर


पुरीविरूद्ध २०७७ माघमा १२ करोड १३ लाख ६२ हजार रुपैयाँ बिगोसहित सम्पत्ति शुद्धीकरण अनुसन्धान विभागले विशेष अदालतमा मुद्दा दायर गरेको थियो। उनले ३० बिगाह सरकारी जग्गा किर्ते गरी आफ्नो नाममा पारेर विभिन्न व्यक्तिहरूलाई बेचबिखन गरी सम्पत्ति बढाएको आरोप लागेको थियो ।

नेकपा माओवादी केन्द्र कोशी प्रदेश कमिटीका कोषाध्यक्ष रेवतराज पुरी सम्पत्ति शुद्धीकरण मुद्दामा दोषी ठहर भएका छन् । गगन नामले समेत चिनिने पुरीलाई विशेष अदालतले सम्पत्ति शुद्धीकरण मुद्दामा कसुरदार ठहर गरेको हो । उनको सजाय निर्धारणका लागि अर्को इजलास बोलाइने विशेष अदालतले जनाएको छ।

विशेष अदालतका न्यायाधीशहरू टेकनारायण कुँवर, तेजनारायण सिंह राई र मुरारीबाबु श्रेष्ठको इजलासले आइतबार पुरीलाई दोषी ठहर गरेको हो । पुरीविरूद्ध २०७७ माघमा १२ करोड १३ लाख ६२ हजार रुपैयाँ बिगोसहित सम्पत्ति शुद्धीकरण अनुसन्धान विभागले विशेष अदालतमा मुद्दा दायर गरेको थियो। उनले ३० बिगाह सरकारी जग्गा किर्ते गरी आफ्नो नाममा पारेर विभिन्न व्यक्तिहरूलाई बेचबिखन गरी सम्पत्ति बढाएको आरोप लागेको थियो । विशेष अदालतमा पुरीसहित उनकी श्रीमती केशावती, दिदी मनमाया, नातेदार देवकुमार, कृष्णकुमार र संगीता पुरीविरुद्ध पनि मुद्दा दायर भएको थियो । विशेष अदालतले उनीहरू सबैलाई कसुरदार ठहर गरेको छ ।

विशेष अदालतमा सम्पत्ति शुद्धीकरणसम्बन्धी मुद्दा चलिरहेकै बेला उनी झापाको क्षेत्र नम्बर ५ को प्रदेश सभा (२) बाट उम्मेदवार बनेका थिए । पुरीमाथि विभागले १२ करोड १३ लाख ६२ हजार रुपैयाँ बिगो माग्दै विशेष अदालतमा मुद्दा दायर गरेको र, उक्त मुद्दा विचाराधीन भएको अवस्थामै माओवादी पार्टीले टिकट दिएको थियो।

विभागले उनकी श्रीमती केशावतीविरूद्ध पनि १२ करोड १३ लाख ६२ हजार र दिदी मनमायाविरूद्ध ९९ लाख ४ हजार रूपैयाँ बिगो मागेको छ । यस्तै, देवकुमार पुरीविरूद्ध ४६ लाख २४ हजार रुपैयाँको बिगो छ भने सम्पत्ति जफत प्रयोजनका लागि संगीताविरूद्ध पनि मुद्दा दायर भएको थियो ।

दमक नगरपालिका-८ (साबिक १३ र १४)मा रहेको ३४ बिगाहा सरकारी जग्गा पुरीले आफू, श्रीमती, दिदी र आफन्तका नाममा ल्याएको विभागको अनुसन्धानमा देखिएको छ । त्यसमध्ये ३० बिगाहा जग्गा बिक्री गरिसकेको पाइएको एक अनुसन्धान अधिकृतले बताए । बाँकी चार बिगाहा जग्गा रोक्का राख्न मालपोतलाई चिठी लेखिएको बुझिएको छ ।

पुरीले २०६६ सालयता सरकारी जग्गा किर्ते गरी आफ्नो र आफन्तको नाममा ल्याएर बिक्रीवितरण गरेको विभागको अनुसन्धानले देखाएको छ । मुद्दामा सरकारी जग्गा बेचेर आर्जित र बढे बढाएको केही सम्पत्ति जफत गर्न माग गरिएको थियो । पुरीकी श्रीमती केशावतीको नाममा रहेको ११ हजार ८४६ वर्गमिटर जग्गा, दुई वटा घर, बा १५ च ७०७६ नम्बरको गाडी, देवकुमारको नाममा रहेको ३९१ वर्गमिटर जग्गा, उनको नामको घर, संगीता र कृष्णकुमार पुरीको नाममा रहेको बिर्तामोडको ३५९३.५२ वर्गमिटर जग्गा जफत गर्न माग गरिएको थियो ।