धादिङ काङ्ग्रेसका नेता अधिकारी यातायात व्यवस्थापनको जिम्मेवारीमा

धादिङ काङ्ग्रेसका नेता अधिकारी यातायात व्यवस्थापनको जिम्मेवारीमा


आगामी फागुन ७ देखि १० गतेसम्म ललितपुरको गोदावरीमा आयोजना हुने नेपाली काङ्ग्रेसको महासमिति बैठकलाई व्यवस्थित एवम् प्रभावकारी बनाउने उद्देश्यले काङ्ग्रेस केन्द्रिय सदस्य धना खतिवडाको संयोजकत्वमा गठित ‘यातायात व्यवस्थापन उपसमिति’मा धादिङ काङ्ग्रेसका युवा नेता एवम् नेपाल लोकतान्त्रिक यातायात व्यवसायी सङ्घका केन्द्रिय सल्लाहकार शरद अधिकारी चयन भएका छन् ।

काङ्ग्रेस केन्द्रिय कार्यालयले जनाएअनुसार सो समितिमा यातायात क्षेत्रमा विशेष योगदान पुऱ्याएका योगेन्द्रनाथ कर्माचार्यसहित केदारनाथ पौडेल, शरद अधिकारी, सानुकाजी प्रजापति, सुवन गिरि, धर्म भण्डारी र महेश्वर थापा चयन भएका हुन् ।

धादिङ काङ्ग्रेसको राजनीतिमा सक्रिय अधिकारी धादिङ काङ्ग्रेसको मात्र नभइ देशभर यातायात क्षेत्रमा सक्रिय र परिचित पात्र हुन् । धादिङ उद्योग वाणिज्य संघका पूर्वसचिव, जिल्ला खेलकुद विकास समिति धादिङका पूर्व अध्यक्ष रहिसकेका अधिकारी धादिङ मण्डली यातायात प्रा.लि.का अध्यक्ष पनि हुन् ।

यसैगरी बनेपाका पुराना नेताको परिचय स्थापित गरेका, लोकतान्त्रिक यातायात व्यवसायी संघका अध्यक्ष योगेन्द्रनाथ कर्माचार्य नेपालको यातायात क्षेत्रका स्थापित एवम् सम्मानित व्यक्तित्व हुन् भने केदार पौडेल बर्दियाका काङ्ग्रेस नेता हुन् । तरुण दल बर्दियाका पूर्वअध्यक्ष उनी लोकतान्त्रिक यातायात व्यवसायी संघका केन्द्रिय महासचिव हुन् । यस्तै, सानुकाजी प्रजापति काठमाडौं र सुवन गिरि नुवाकोटका युवा नेता हुन् । धर्म भण्डारी मजदूर संघका केन्द्रिय अध्यक्ष र महेश्वर थापा ललितपुरका काङ्ग्रेस नेता हुन् ।