गिरिजाका ‘पिए’माथि निगरानी !

गिरिजाप्रसाद कोइराला प्रधानमन्त्री रहेका बेला निजको स्वकीय सचिव (पीए) रही काम गर्ने पुरन्जन आचार्य नामक ब्यक्तिमाथि अख्तियार दुरुपयोग अनुसन्धान आयोग र सम्पत्ति शुद्धिकरणको आँखा परेको जानकारी घटना र विचारलाई प्राप्त भएको छ ।

संसारमै अस्थिरता र इसाईकरणका निम्ति लगानी गर्दै आएको जर्ज सोरस फाउन्डेसनको नेपालस्थित बोर्डमा सञ्चालक सदस्य रहेका पुरन्जन आचार्यले राजधानी काठमाडौको मुटुमै दुईवटा भब्य बङ्ग्ला खडा गरेको र उनको शेयर मार्केटलगायत अन्य विभिन्न क्षेत्रमा अपारदर्शी लगानी रहेको तथ्य फेला परेपछि नियमनकारी निकायको आँखा आचार्यमाथि परेको बताइन्छ । उनले सिंहदरबार छेउको बङ्ग्ला भाडामा लगाएर आफू भने छुट्टै बङ्ग्लामा बस्ने गरेका छन् ।

गिरिजाको पिए रहँदा महेश आचार्यसँग मिलेर विभिन्न अनुचित धन्दामा संलग्न रहने गरेको भनी कोइराला क्याम्पभित्रै विवाद र सन्देहको पात्र बनेका पुरन्जन जर्ज सोरस फाउण्डेसनका तर्फबाट विभिन्न पत्रकार तथा राजनीतिकर्मीहरूलाई अपारदर्शी ढङ्गले रकम उपलब्ध गराउने कार्यमा संलग्न रहँदै आएको उनका निकटवर्तीहरू बताउँछन् । पछिल्लो समयमा रास्वपाप्रति निकटता दर्शाउने आचार्यले शेरबहादुर देउवा दम्पतिविरुद्ध सञ्चारमाध्यमहरूमा आफ्नो भडास पोख्दै आएका छन् ।