२६ जेष्ठ २०८०, शुक्रबार

धनगढी सभामा पूर्व ‘श्री ५’को प्रश्न- के अग्रगामी भनेको परावलम्बी नेपाल हो ?

  प्रकाशित मिति
८ जेष्ठ २०८०, सोमबार १२:२१


file photo

पूर्व श्री ५ ज्ञानेन्द्र शाहले सोझासादा जनतालाई मुर्ख भन्दै तिनलाई झुक्याएर आफ्नो स्वार्थसिद्ध गर्ने यतिबेलाको प्रपञ्च खुल्दै गएको बताउनुभएको छ । सोमबार धनगढीमा आयोजित अभिनन्दन सभालाई सम्बोधन गर्दै उहाँले चार दशकअघिसम्म हाम्रो देश कृषि, वन आदि कतिपय विषयमा आत्मनिर्भर रहेको, आफ्नो आवश्यकतालाई परिपूरण गरेर धान-चामल निर्यात गरेको, तर आज ग्रामीण तथा शहरी कलकारखाना, साना लघु उद्योग धन्दाहरू सारा बिलाएको र जल जमिन जंगल जडिबुटी र जनस्तरीय सीप सबैतिर आज उजाडको अवस्था रहेको उल्लेख गर्नुभयो र प्रश्न गर्नुभयो- ‘यस्तो अवस्था कसरी-किन आयो ?’

यस्तो छ उहाँको सम्बोधन-

उपस्थित महिला तथा सज्जनवृन्द,
तपाईंहरूले आयोजन गर्नुभएको यो समारोह आफैमा एउटा संयोजनकारी महत्वपूर्ण काम हो । यहाँ आएर मलाई दुई-चार शब्द बोल्ने मौका दिनुभएकोमा आयोजकहरू र उपस्थित सुदूरपश्चिमी भेगका सबैमा हार्दिक आभार व्यक्त गर्दछु ।

धनगढी नेपालको सुदूरपश्चिमी भूखण्डको पुरानो चहलपहलको स्थान हो । यो अहिले उद्यम इलम र व्यवसायको शहरी केन्द्र बनेको छ । आफ्नो थातथलो र जमिन पवित्र मान्ने यस भेगका भूमिपुत्रहरू आज यस क्षेत्रको चौतर्फी विकास चाहन्छन् । त्यसका निम्ति बढ्दै गएको उत्सुकता तथा जागरुकता निश्चय पनि सह्राहनीय छ ।

राष्ट्रनिर्माणको अभियान र निरन्तरताको भौतिक, शैक्षिक तथा सामाजिक विकासको क्रममा अब नेपालका कुनै पनि भूभाग टाढा र नजिक छैनन् । राष्ट्रिय अवधारणा बुबाज्यूको राज्यकालदेखि नै उत्कर्षका रुपमा अघि बढेको हो । टिकापुर तथा महेन्द्रनगर यस क्षेत्रमा आज जुन रुपमा खडा छन्, त्यो त्यसैको उदाहरण हो । तर जुन प्रकारको राष्ट्रवादी सोच, राष्ट्रिय चिन्तन र सर्वाङ्गीण उन्नतिको उच्च ध्येय बोकेर समग्र राष्ट्रको उत्थानको शुरुवात भएको हो- त्यो त्यही गति र प्रवाहमा अघि बढ्न सकिरहेको छैन । यो हामी सबैका निम्ति सुखद् होइन । डोटी, डडेलधुरा, कैलाली, कञ्चनपुर, बैतडी, दार्चुला, आछाम र बाजुरा यो भेगका सुन्दर, रमणीय र तीर्थस्थलहरू हुन्- ती सबैलाई समेटेर धनगढी, महेन्द्रनगर, टीकापुर जस्ता आधुनिक चरणमा खडा भएका केन्द्रहरूले जुन प्रकारको ज्योति प्रशारण गर्नुपर्ने हो- त्यो अपेक्षित रूपमा हुन नसकेको कटुसत्य हो ।

हाम्रै आँखाले देखेको र स्वयम् अनुभूत गरेको कुरा हो- चार दशकअघिसम्म हाम्रो देश कृषि, वन आदि कतिपय विषयमा आत्मनिर्भर थियो । आफ्नो आवश्यकतालाई परिपूरण गरेर हामी धान चामल निर्यात गर्दथ्र्यौं । ग्रामीण तथा शहरी कलकारखाना, साना लघु उद्योग धन्दाहरू कता बिलाए ? किन हराए ? जल जमिन जंगल जडिबुटी र जनस्तरीय सीप सबैतिर आज उजाडको अवस्था छ । हाम्रा घर आँगन पिँढी र छिँडीमा चल्ने जन शिल्पीका कैयन् कुटीर उद्यम व्यवसायहरू पुरापूर लोप भएर गएका छन् । हिजोका हाम्रो अग्रजहरू र हाम्रा पौरखी पुस्ताहरूलाई श्रेय दिएर सम्झना गर्ने कि नगर्ने ? यस्ता थुप्रै प्रश्नहरू तपाईं-हामीसामु छन् ।

सोझासाधा जनतालाई मुर्ख भन्दै तिनलाई झुक्याएर आफ्नो स्वार्थसिद्ध गर्ने आजको प्रपञ्च अब खुल्दै गएको छ । नेपाली जनतालाई आफ्नो भूभाग र आफ्नो राष्ट्रिय अस्तित्व हुँदाहुँदै शरणार्थी बनाएर अर्काको देशमा श्रम पसिना बगाउन पठाएर आज जे हर्कत गरिरहेका छन्, त्यसबाट हाम्रो इज्जत, गौरव सबै लोप भएर गएको छ । देशभित्रै बसौँ, देशमै पसिना बगाउँ र आफ्नो पौरखले आफ्नै देश सपारौँ भन्ने भावना हराउँदै गएको छ ।

के नयाँ नेपाल भनेको यही हो ? के अग्रगामी भनेको परावलम्बी नेपाल हो ? के नेपालको आफ्नो अस्तित्व छैन ? हामी वीर परिश्रमी र स्वाभिमानी नेपाली तर आज हाम्रो वीरता र हाम्रो स्वाभिमान हाम्रो श्रम सीप सबैथोक खोसिएको त छैन ? यस्तो दारुण दृश्य देख्दा हामी सबैको आँखा रसाउँदै गएको छ । आजको युग विकासको युग हो । आजको युग प्रविधिको युग हो । हामी आफ्नै श्रोत-साधन आफ्नै सामथ्र्य र आफ्नै स्वतन्त्र सत्ताद्वारा आफ्नो युगानुकूल उन्नति चाहन्छौँ ।

त्यसैले सोच्ने बेला आयो अब कुन के-कस्तो राष्ट्रिय दृष्टिकोण हामीले लिने ? कस्तो प्रणाली पद्धति र परिपाटी हामीले अँगाल्ने ? सोचौँ गहिरिएर सोचौँ, अझ दिलैदेखि सोचौँ, नेपाली भएर सोचौँ, नेपाल आमाको हावापानी माटो र मुटुलाई छोएर सोचौंँ, देशभन्दा ठूलो अरु केही हुँदैन ।

आजको टड्कारो अवस्थालाई नदेखेको र नबुझेको जस्तो गरेर, कुरा बटारेर, अरुलाई अल्मल्याएर र निषेध गरेर अनि कोठे र ओठे जवाफ फर्काएर नेपाल र नेपालीको भविष्य सप्रिँदैन । भोलिको सुन्दर सपनालाई साकार र विपना बनाउन नेपाली मत, मान्यता तथा मनोभावनाअनुसार- नेपाली जनतालाई नै जिम्मा दिउँ- यसैमा हाम्रो कल्याण छ ।


324
Shares

प्रतिक्रिया दिनुहोस !
सम्बन्धित खबरहरु

‘धेरै पटक शरणार्थीको हैसियतका लागि आवेदन दिएका विदेशी नागरिकलाई देश छोड्न बाध्य तुल्याउन सक्ने’ जापानी संसदको माथिल्लो सदनले आप्रवासन तथा

गणतन्त्र दिवसका अवसरमा यही जेठ १५ गते खुला गरिएको पोखराको फेवा किनारास्थित रत्न मन्दिर घुम्ने विदेशी पर्यटकको सङ्ख्या अति न्यून

यसपालि नेपालका धेरैजसो स्थानमा अधिकतम तापक्रमले ‘रेकर्ड ब्रेक’ गर्ने देखिएको छ । केही स्थानमा रेकर्ड ब्रेक भइसकेको र अझै तातो

चालु आर्थिक वर्षको १० महिनामा कूल रु १० खर्ब पाँच अर्ब विप्रेषण मुलुकभित्र भित्रिएको छ । वैदेशिक रोजगारीमा जाने कामदारको