उत्तरपश्चिम पाकिस्तानको एक प्रहरी मुख्यालयमा रहेको मस्जिद विस्फोटको भग्नावशेषबाट मङ्गलबार अझै शवहरू निकाल्ने क्रम जारी रहेको र हालसम्म ९० जनाको मृत्यु भएको बताइएको छ । एक सय ५० भन्दा बढी घाइते भएका छन् ।

प्रान्तीय राजधानी पेशावरमा सोमबार दिउँसोको प्रार्थनाको समयमा आक्रमण भएको थियो । अफगान सीमासँग जोडिएका क्षेत्रहरुमा आक्रमणहरु लगातार बढिरहेको छ । मङ्गलबार अस्पतालबाट एएफपीलाई २३ वर्षीय प्रहरी हवल्दार वजाहत अलीले भने, ‘म सात घण्टासम्म मृत शरीरसहितको भग्नावशेषमुनि फसेको थिएँ , मैले बाँच्नको लागि सबै आशा गुमाएको थिएँ ।’

पेशावरको मुख्य अस्पतालका प्रवक्ता मुहम्मद असिम खानले घटनास्थलबाट थप शव आएपछि मृत्यु हुनेको संख्या ९० पुगेको एएफपीलाई ताएका हुन् । एक सय ५० भन्दा बढी घाइते भएका अधिकारीहरुले बताएका छन् ।

शहरका प्रहरी प्रमुख मुहम्मद इजाज खानले मारिनेमा ९० प्रतिशतभन्दा बढी प्रहरी नै थिए, जसमध्ये ३०० देखि ४०० जना कम्पाउण्डको मस्जिदमा प्रार्थनाका लागि भेला भएका बताएका छन् ।

‘आज बिहान हामी भत्किएको छतको अन्तिम भाग हटाउन जाँदैछौँ ताकि हामी थप शवहरू निकाल्न सकौँ, तर हामी कोही पनि बाँचेकाहरु फेला पर्ने आशामा छैनौँ’, प्रहरी प्रवक्ता बिलाल अहमद फैजीले बताएका छन् ।

प्रार्थना सुरु गरेको केही सेकेन्डपछि विस्फोट भएको र ‘मैले कालो धुवाँ आकाशमा उठेको देखेँ , म आफ्नो ज्यान बचाउन बाहिर भागेँ, ४७ वर्षीया प्रहरी अधिकारी शाहिद अलीले बताएका छन् ।