चर्चित सिने अभिनेत्री एवम् निर्मात्री स्वेता खड्का हालै आफ्ना केही सहकर्मीहरूसहित विधिवत रूपले नेपाली काङ्ग्रेस पार्टी प्रवेश गरेकी छन् । काङ्ग्रेस सभापति एवम् प्रधानमन्त्री शेरबहादुर देउवाले नै स्वेता, भुवन केसी, रविन्द्र खड्का जस्ता हस्तीहरूलाई टीका लगाएर पार्टीमा प्रवेश गराएका छन् । चर्चित कलाकारहरूको काङ्ग्रेस-प्रवेशले सम्बन्धित क्षेत्रमा खास चर्चा पायो । कतिले उनीहरूको यस कदमको आलोचना गरे भने कैयनले जमेर प्रशंसा पनि गरे । तर, प्रशंसा गर्नेभन्दा आलोचना गर्नेहरू नै भारी परेजस्तो महसूस भएर हुनुपर्छ, वौद्धिक पहिचान समेत बनाएकी स्वेताले सामाजिक सञ्जालमार्फत् आफू काङ्ग्रेस प्रवेश गर्नुको रहश्य खोलिदिइन् । आखिर किन उनले स्थानीय निर्वाचनको मुखैमा काङ्ग्रेस ज्वाइन गरिन् त ? जानकारी लिऔँ स्वेताकै शब्दमा ।

‘कलाकारिता, ब्यवसाय अनि समाजिक सेवाको बाटो हुँदै म यतिखेर खुल्ला राजनैतिक मूलधारमा प्रवेश गरेकी छु । विद्यार्थी जीवनदेखि नै महामानव विशेस्वरप्रसाद कोइरालाको बारेमा पढ्दै र सुन्दै आइरहेकी मैले अन्ततः उनै महामानवको बिचारधारामा आफुलाई समाहित गर्दै नेपाली काङ्ग्रेससँग आफ्नो आवद्धता जनाएकी छु । मैले लिएको यो राजनैतिक निर्णयप्रति विभिन्न क्रिया-प्रतिक्रियाहरू अवश्य नै प्राप्त हुन्छन् । यसरी प्राप्त हुने सकारात्मक र नकारात्मक दुवै किसिमका प्रतिक्रियाहरूलाई म सुझावको रूपमा ग्रहण गर्दै मेरो राजनैतिक यात्रालाई अगाडि बढाउने प्रण गर्दछु ।

एउटा कलाकारले कुनै एक पार्टीको ब्यानरभित्र समाहित हुनु हुन्न भन्ने सोच ब्याप्त छ । कलाकारले कलाकारिता नै गर्नुपर्छ राजनीति गर्नु हुन्न भन्ने धारणाको प्रतिवादस्वरुप मैले नेपाली काङ्ग्रेसको राजनीतिक सिद्धान्तमा आफुलाई समाहित गराएकी छु । यो निर्णय लिनुभन्दा अगाडि मैले धेरै पटक स्व-संवाद, स्व-विश्लेषण र स्व-विचार गरेकी छु । मेरो अन्तरमनको कुनामा लुकेको सामाजिक विकास, परिवर्तन र रुपान्तरणको चाहनाले मलाई राजनीतिको प्रभावबाट कुनै ब्यक्ति टाढा हुन सक्दैन भन्ने भाव उत्पन्न गरायो । हामीले राजनीतिबाट जति नै टाढा रहन खोजे पनि हाम्रो हरेक दैनिकीमा राजनीतिको प्रभाव रहेको हुन्छ नै । त्यो प्रभावलाई हामी कदापि नकार्न सक्दैनौँ । अतः राजनीतिको यो अक्षुण्ण प्रभावलाई आत्मसात गर्दै मैले आफ्नो पाइला अगाडि बढाएकी हुँ । मेरो यो पाइलामा आम परिवर्तनकारी, विकासप्रेमी तथा बुद्धिजीवी वर्गको साथ सल्लाह र सुझाव पाउने आशा बोकेकी छु ।

राजनीति विशुद्ध ‘सामाजिक सेवा’को क्षेत्र हो न कि ‘व्यावसायिक पेशा’ । राजनीतिलाई कमाइ गरीखाने माध्यमको रूपमा प्रयोग गरी अकुत सम्पत्ति आर्जनमा लिप्त हुने भ्रष्ट राजनीतिज्ञहरूलाई विस्थापित गराउनको निमित्त अब हामी आफू पनि अग्रसर हुनुपर्ने आवश्यकता महसूस गरेकी छु । सधैं राजनीतिलाई ‘फोहोरी खेल’को रूपमा परिभाषित गर्दै नेताहरूप्रति ‘धारे हात’ लगाउने अनि गालीको वर्षा गर्ने हाम्रो निष्कृय प्रवृत्तिलाई त्याग्ने बेला आएको छ । सिस्टम (प्रणाली) परिवर्तनको लागि सिस्टम निर्माणकै एउटा हिस्सा हुनु जरुरी छ । यसको लागि राजनीति नै एउटा उत्तम माध्यम हो । मैले यही माध्यमलाई आत्मसात गरेकी हुँ । यसको लागि मैले आदरणीय बीपी कोइराला, गणेशमान सिंह र कृष्णप्रसाद भट्टराईको पथमा आफ्नो पाइला अगाडि बढाएकी छु ।

मलाई थाहा छ, कुनै पनि राजनैतिक दलको संस्थागत सिद्धान्त खराब हुँदैन । त्यो सिद्धान्तलाई कार्यान्वयन गर्ने केही नेतृत्वकर्ताको ब्यक्तिगत आचरण मात्र खराब हो । एमाले, काङ्ग्रेस, माओवादी, राप्रपा लगायत सबै दलका संस्थागत सिद्धान्तहरू राम्रा छन् । सबै दलले विकास, समृद्धि र परिवर्तनको एजेण्डा उठाएका छन् तर ती एजेण्डाहरू कार्यान्वयन तहमा असफल भएका मात्र हुन् । यही असफलताका कारण उद्योग, ब्यवसाय, कलाकारिता, कृषि तथा पर्यटनलगायतका सबै क्षेत्रहरू प्रभावित भएका छन् । हाम्रो दैनिक ब्यक्तिगत जीवनमा पनि यसको प्रत्यक्ष नकारात्मक प्रभाव परिरहेको छ । अतः केही सीमित ब्यक्तिहरूको स्वार्थका कारण असफल भएका ती एजेण्डाहरूलाई सफल बनाउनको निमित्त हामी सबैको सक्रियताको खाँचो छ । पोखरी फोहर भयो भनेर पोखरीको ‘लेउ’लाई गाली गर्नु भन्दा त्यो लेउ हटाउन आफैंले पोखरीभित्र छिर्ने हिम्मत गर्नुपर्छ । अतः सबै पार्टीमा धेरथोर लेउ लागेको छ त्यसको सरसफाइको लागि हाम्रो सक्रियता खाँचो छ ।

मैले आफ्नो राजनैतिक सक्रियताको लागि भने नेपाली काङ्ग्रेसलाई चुनेकी छु । मेरो पारिवारिक पृष्ठभूमिले पनि मलाई नेपाली काङ्ग्रेसको सिद्धान्तलाई अँगाल्न सहयोग पुगेको हो । नेपालको राजनैतिक परिवर्तनमा अहम् भूमिका खेल्ने नेपाली काङ्ग्रेस जस्तो विशाल पार्टीमा मलाई स्थान दिने आदरणीय पार्टी सभापति तथा सम्माननीय प्रधानमन्त्री श्री शेरबहादुर देउवाज्युप्रति हार्दिक आभार ब्यक्त गर्दछु । साथै मेरो ब्यवसायिक, सामाजिक तथा राजनैतिक यात्राको लागि मलाई सधैं हिम्मत, हौसला र उर्जा प्रदान गर्ने मेरो परिवार गण, मेरा अग्रज ब्यक्तित्वहरू लगायत मेरा शुभचिन्तकहरूप्रति म हार्दिक नमन गर्दछु । विगतका दिनमा मैले यो पार्टीको लागि ब्यक्तिगत रूपमा त्यस्तो ठुलो योगदान दिन सकेकी छैन । आगामी दिनमा भने म मेरो मन बचन र कर्मले भ्याएसम्मको योगदान दिने प्रयास गर्नेछु । नेपाली काङ्ग्रेसको नीति, सिद्धान्त र यसको मूल्य मान्यतालाई आत्मसात गर्दै कुनै ब्यक्तिगत स्वार्थहरू नराखी स्वच्छ रूपमा सामाजिक विकास र विसुद्ध ‘सेवा’को भाव बोकेर आफूलाई एउटा असल कार्यकर्ताको रूपमा चिनाउने प्रयासमा कुनै कमी हुने छैन । साथै, म एउटा कलाकार र ब्यवसायी पनि भएको नाताले यस दलभित्र रहेर तमाम ब्यवसायी र कलाकर्मीहरूको हकहितको निमित्त आफ्नो आवाज बुलन्द गर्नेछु । सामाजिक सेवाको पाटोलाई अझ सशक्त रूपमा अगाडि बढाउनको निमित्त नेपाली काङ्ग्रेससँगको आवद्धताले मलाई थप मार्ग प्रशस्त गराउनेमा विश्वस्त छु ।

अन्तमाः हरेक ब्यक्तिलाई आ-आफ्नो राजनैतिक स्वतन्त्रता छ । मेरो वेचारिक सिद्धान्तसँग मेल खाने राजनैतिक दलसँगको निकटता, आवद्धता वा सहकार्यपश्चात् पनि फरक विचार राख्ने कुनै ब्यक्ति वा दलप्रति मेरो कुनै पुर्वाग्रह रहने छैन । जो जहाँ रहेपनि, जो जता गए पनि, देश र जनताको निमित्त निःस्वार्थ भावले काम गर्न सकौँ । जय नेपाल !