३ माघ २०७८, सोमबार

‘वैदेशिक रोजगारीका सबै चरण सुरक्षित हुनुपर्छ’ : कृष्मा शर्मा

  प्रकाशित मिति
७ पुष २०७८, बुधबार ०८:१३


सोलिडारिटी सेन्टरकी वरिष्ठ कार्यक्रम अधिकृत हुनुहुन्छ कृष्मा शर्मा । वैदेशिक रोजगारीलाई सुरक्षित बनाउनका लागि विभिन्न सरोकार पक्षसँग कार्यरत शर्मासँग गरिएको कुराकानीको सार प्रस्तुत गरिएको छ :

० सोलिडारिटी सेन्टरले के काम गर्छ ?
– सोलिडारिटी सेन्टरले विश्वका ६० भन्दा बढी देशमा काम गर्छ । यसले ज्यादाजसो कामदारका अधिकारको क्षेत्रमा काम गर्छ । ट्रेड युनियन, नागरिक तथा सामुदायिक संस्थाहरूसँग काम गर्छ ।

० तपाईंलाई वैदेशिक रोजगारीसँग धेरै लगाव रहेको देखिन्छ, कारण के होला ? कुनै पृष्ठभूमि जोडिएको छ कि ?
– वैदेशिक रोजगारीसँग अहिले कुन नेपालीको पृष्ठभूमि र वर्तमान जोडिएको छैन होला र ? ब्यक्तिगत रूपमा मेरो त त्यस्तो केही छैन । परिवारमा कोही पनि वैदेशिक रोजगारीसँग सम्बद्ध नभए पनि मुलुक रेमिटेन्सले धानिरहेको छ । प्रत्येक दिन ठुलो सङ्ख्यामा युवाहरू विदेशिने गरेका छन् । कोही अरुको देखेर आकर्षित भए त कोही बाध्यताले विदेशिएका छन् । कुनै पनि मुलुकमा जाने कामदारहरू सुरक्षित हुनुपर्छ भन्ने हो । उनीहरूले प्राप्त गर्ने सुविधा पाउनु पऱ्यो, अर्काको देशमा जोखिममा पर्नुभएन । कामको सिलसिलामा विभिन्न देशको भ्रमण गर्दा मैले ट्रान्जिटमा फारम भर्न नजान्ने नेपाली युवाहरू अलमल्ल परेको देखेकी छु । विदेश जानुअघि नै आफ्नो रकम ठगेर काठमाडौंमा अलपत्र भएका मानिसहरूसँग भेटेकी छु । विदेशमा जे कामका लागि भनेर लगिएको थियो त्यो नभइ अरु नै काममा लगाउँदा काम गर्नै गाह्रो भएर डिप्रेसनमा गएको सुनेकी छु । वैदेशिक रोजगारीको क्षेत्रलाई ब्यवस्थित बनाउनुपर्छ भन्ने सधैं लाग्ने गर्थ्यो । संयोग भनौँ या शौभाग्य, अहिले कामको दायरा पनि यही बन्न पुग्यो ।

० वैदेशिक रोजगारीको अहिलेको सबैभन्दा ठुलो समस्याचाहिँ के हो ?
– धेरै छन्, नीतिदेखि ब्यवहारसम्म । वैदेशिक रोजगारीको सम्पूर्ण चक्रलाई लिएर काम गर्नुपर्ने हुन्छ । जानुअघिका समस्यादेखि फर्किएर गर्ने रेमिटेन्सको प्रयोगसम्ममा । वैदेशिक रोजगारीका सबै चरण्हरू सुरक्षित हुनु पर्दछ ।

० तपाईंहरूले अन्तर्राष्ट्रिय श्रम सङ्गठन (आइएलओ) को अभिसन्धि १९० को अनुमोदनका लागि विभिन्न कार्यक्रमहरू गर्दै आउनुभएको छ । वैदेशिक रोजगारीबीच के सम्बन्ध छ ?
– आइएलओ अभिसन्धि १९० ले कार्यस्थलमा हिंसाको बारेमा उल्लेख गरेको छ । कुनै पनि प्रकारको हिंसा हुनु हुँदैन भनिएको छ । कार्यस्थलमा हुने हिंसाको शारीरिक र मानसिक स्वास्थ्यमा पर्ने असरसम्मको कुरा उल्लेख गरेको छ । वैदेशिक रोजगारीका सबै चरणहरूलाई आइएलओ १९० ले समेट्छ, सरोकार राख्छ । कार्यस्थल सुरक्षित हुनु भनेको कामदार सुरक्षित हुनु हो । नेपाली कामदारहरूको सुरक्षाको सवाल टड्कारो रूपमा उठिरहेका बेला अभिसन्धि १९० निकै महत्वपूर्ण छ । यसले कामदारका सबै प्रकारका, सबै स्थानका सुरक्षाहरूलाई जोडेको छ । नेपालका मात्र नभइ कुनै पनि देशका कामदारका लागि आईएलओ अभिसन्धि १९० महत्वपूर्ण छ ।

० तपाईं कुनै बेला सूचनाको हकको अभियन्ता हुनुहुन्थ्यो, अहिले सूचनाको हकको अभियान कहाँ पुग्यो ?
– मैले सूचनाको हकका बारेमा काम गर्दा पनि वैदेशिक रोजगारीलाई जोडेर गरेको थिएँ । सन् २०१३ मा हामीले महोत्तरी र कैलालीका गाउँ–गाउँमा गएर नागरिकलाई सचेतनाका तालिमहरू दियौँ । कुनै पनि कुराको बारेमा जानकारी किन आवश्यक छ भनेर बुझायौँ, बुझाउने कोशिस ग¥यौँ । सूचनाको हक र पहुँचका बारेमा अहिले पनि अभियानहरूको उत्तिकै आवश्यकता छ जति पहिला थियो । विशेषगरी महिला र पछाडि पारिएका वर्गका लागि सूचनाको हकले अधिकार स्थापित गर्न मद्दत गर्छ । सूचनाको हकले पारदर्शिता र जवाफदेहिता बढाउँछ । त्यसैले यो अभियान जारी राख्नुपर्छ ।

० तपाईंलाई नेपाली महिलाहरू के कारणले पछि परेका हुन् जस्तो लाग्छ ?
– हाम्रो हुर्काइ र समाजिक प्रक्रियाले महत्वपूर्ण भूमिका खेलेको छ । खस्किएको आत्मविश्वास र परनिर्भरता अर्को कारण हो । विभेदले आत्मविश्वास खस्काउँछ, आफ्नो खुट्टामा उभिने वातावरण नहुँदा परनिर्भरता बढ्छ । महिलाहरूलाई लक्षित गरेर आत्मविश्वास बढ्ने कार्यक्रमहरू अघि सार्नुपर्छ, घरैबाट विभेद हटाउनुपर्छ । पहिलाभन्दा अवस्थामा अलि सुधार आएको छ तर पनि समानताको वातावरण सबैतिर बन्न सकेको छैन ।

० अहिले अन्तर्राष्ट्रिय आप्रवासन दिवस चलिरहेको छ, के भन्न चाहनुहुन्छ ?
– अहिले विश्वभरी नै विभिन्न कार्यक्रम गरेर यो दिवस मनाइँदैछ । नेपालमा पनि हामी मनाइरहेका छौँ । एउटा झोला बोकेर विदेश लाग्दै गरेको युवाले यस दिवसमा भएका छलफल र कुराकानीको प्रभाव अनुभव गर्न पाउनुपर्छ । यो एक दिन या एक हप्ता काम गरेर हुने कुरा होइन । वैदेशिक रोजगारीलाई सुरक्षित बनाउन निरन्तर काम गर्नुपर्ने हुन्छ ।



प्रतिक्रिया दिनुहोस !
सम्बन्धित खबरहरु

मुलुकको प्रमुख प्रशासनिक केन्द्र सिंहदरबार कोरोना भाइरस महामारीको त्रासमा परेको छ । चार सचिवसहित सयभन्दा बढी कर्मचारीलाई कोरोनासंक्रमण भएपछि त्रास

रौतहटमा नेकपा (एमाले) स्थायी कमिटी सदस्य प्रभु साह पक्षले एकलौटी रुपमा जिल्लाको नयाँ नेतृत्व घोषणा गरेको भन्दै अर्को पक्षले विद्रोह

उत्तर कोरियाले फेरि एक अज्ञात क्षेप्यास्त्र प्रहार गरेको दक्षिण कोरियाको सेनाले दाबी गरेको छ । उत्तर कोरियाले अर्को आणविक हतियार

पूर्णप्रसाद मिश्र, काठमाडौं प्रत्येक वर्ष पौष शुक्ल पूर्णिमादेखि माघ शुक्ल पूर्णिमासम्म एक महिना विधिपूर्वक गरिने स्वस्थानी व्रत एवं माघस्नान आजदेखि