८ कार्तिक २०७८, सोमबार

‘राष्ट्रिय सुरक्षा-स्वार्थमा चुनौती थपिएकोले मन पोलेको छ’ : पूर्व श्री ५ ज्ञानेन्द्र

  प्रकाशित मिति
२६ आश्विन २०७८, मंगलवार १७:०७


पूर्व श्री ५ ज्ञानेन्द्र शाहले देशभक्ति र राष्ट्रपतिको भावना मानिसमा दमित भए पनि नामेट हुन नसक्ने, बरु योग्य समयमा समुचित तरिकाबाट त्यो प्रस्फुटित हुने धारणा राख्नुभएको छ ।

विजयादशमी २०७८ को उपलक्ष्यमा नेपाली दिदीबहिनी दाजुभाइको नाममा शुभकामना सन्देश जारी गर्दै पूर्व श्री ५ ले केही समययता जिम्मेवार एवम् देशभक्त नागरिकहरूबाट राष्ट्रको चिन्ताले व्याकुल भइ व्यक्त विचारहरूलाई आफूले राष्ट्रिय अनुराग र निष्ठा मात्र प्रकट भएको नभइ आम नेपालीमा राष्ट्रवादी चेतको सञ्चारसमेत गराएको रूपमा बुझेको बताउनुभएको छ ।

हरेक नेपालीलाई आफ्नो स्वतन्त्र विचार र आस्थाको अधिकार छ, हुन्छ र रहन्छ भन्दै उहाँले राजसंस्थाले वैचारिक आस्थाका आधारमा विभेद नगर्ने, आफूहरूको त्यस्तो मान्यता र परम्परा नरहेको पष्ट्याउनुभयो । राष्ट्रिय आवश्यकता र जनचाहनाको परिधिबाहिरबाट कुनै पनि समस्याको समाधान नखोजिएको र नखोज्ने शाहवंशीय राजपद्दतिको इतिहासले स्पष्ट गरेको पूर्व श्री ५ को प्रष्टोक्ति छ ।

पूर्व श्री ५ द्वारा दशैँको उपलक्ष्यमा जारी शुभकामना सन्देश यस्तो छ

प्यारा नेपाली दिदीबहिनी तथा दाजुभाइ, विजया दशमीको पावन अवसरमा हामी देशभित्र र देशबाहिर रहे÷बसेका सम्पुर्ण नेपालीहरूमा शान्ति र सुखको लागि शुभकामना व्यक्त गर्दछौँ ।

हाम्रो समाज सनातनिक आदर्श र पुर्ख्यौली पौरखबाट पृथक छैन । तर हाम्रो राजनीति र राजकाजी चालचलन त्यसअनुरुप हुन सकेनन् । लोक कल्याणका हेतु, राजनीतिक स्वच्छता, जनप्रियता र जनआकाङ्क्षा पूर्तिको दिव्य मान्यतामा आधारित हुनुपर्ने हो । तर राजनीतिक व्यवस्था आफू, आफ्नो समूह र त्यसभित्रको गुट-उपगुटमा अल्झिएको छ । कोरोनाको महामारी, अनेक प्राकृतिक विपत्ति, बेरोजगारी, महँगी र अस्थिरताको भुमरीमा फसेका आम नेपालीले सत्य सेवा तथा लोकहितको अनुभूति गर्न पाइरहेका छन् त ?

कुनै पनि परिवर्तनको मर्म देशसँग अन्तरसम्बन्धित हुने गर्दछ । त्यसको प्रभाव जनताले आफ्नो दैनिक जीवनमा अनुभूत गर्न सक्नु पर्दछ । दुर्भाग्यवश शिक्षा तथा स्वास्थ्यको व्यापारीकरण, विकास निर्माणका कामको प्रष्टिकरण, प्रशासनिक र राजनीतिक पेशाले सीमित व्यक्तिलाई फाइदा पुर्याउने र न्यायिक क्षेत्रमा उत्पन्न विचलनले सबैतिर निराशाको बादल छाएको छ । त्यसैगरी सार्वभौमिकता, राष्ट्रियता र राष्ट्रिय एकता दुर्लभ गराउने, मौलिक धर्म संस्कृति सङ्कटमा पार्ने, राष्ट्रहितमा केन्द्रित रहनुपर्ने परराष्ट्र नीति असन्तुलित भइ राष्ट्रिय सुरक्षा स्वार्थमा चुनौती थपिएकोले हाम्रो मन पोलेको छ ।

हरेक नेपालीलाई आफ्नो स्वतन्त्र विचार र आस्थाको अधिकार छ, हुन्छ र रहन्छ । राजसंस्था वैचारिक आस्थाका आधारमा विभेद गर्दैन, त्यो हाम्रो मान्यता पनि होइन न त परम्परा । शाहवंशीय राजपद्दतिको इतिहासले स्पष्ट गरेको छ, राष्ट्रिय आवश्यकता र जनचाहनाको परिधिबाहिरबाट कुनै पनि समस्याको समाधान खोजेको छैन, खोज्दैन पनि । देशभक्ति र राष्ट्रपतिको भावना मानिसमा दमित भए पनि नामेट हुन सक्तैन, योग्य समयमा समुचित तरिकाबाट त्यो प्रस्फुटित हुने गर्दछ । केही समययता जिम्मेवार एवम् देशभक्त नागरिकहरूबाट राष्ट्रको चिन्ताले व्याकुल भइ व्यक्त विचारहरूलाई हामीले राष्ट्रिय अनुराग र निष्ठा मात्र प्रकट गरेको नभइ, आम नेपालीमा राष्ट्रवादी चेतको सञ्चारसमेत गराएको रूपमा बुझेका छौँ ।

देशको तत्कालिन परिस्थितिले हामीलाई बेग्लै जिम्मेबारी ग्रहण गर्न बाध्य तुल्याए पनि प्रजातन्त्रबिनाको राजसंस्था र राजसंस्थाबिनाको प्रजातन्त्र हाम्रो जस्तो मुलुकमा सान्दर्भिक हुन सक्तैन भन्ने आवोध हामीले गरेका छौँ । प्रजातान्त्रिक, प्रगतिशील या अन्य जुनसुकै विचारप्रति आस्थावान भए पनि राष्ट्रप्रतिको श्रद्धाले सबै नेपालीलाई एउटै मालामा उन्ने विश्वास हामीले लिएका छौँ । अतीतका गौरवपूर्ण विधि व्यवस्थालाई सम्झेर विद्यमानका नमिल्दा स्थितिलाई सुधार्ने सकारात्मक र देशसुहाउँदो राजनीति, राज्य व्यवस्थाका सबै कृयाशील शक्तिहरूबाट सही सोच राख्नु देश र जनताको हितमा उपयुक्त अनुभूति हो भन्ने हाम्रो धारणा छ । देशभन्दा माथि हामी कोही पनि छैनौँ ।

श्री नवदुर्गा भवानीले सबै नेपालीमा राष्ट्रिय कर्तव्य निर्वाह गर्न सक्ने सामर्थ प्रदान गरुन्, यही हाम्रो कामना छ । जय नेपाल ।



प्रतिक्रिया दिनुहोस !
सम्बन्धित खबरहरु

पाँचथरको फिदिम नगरपालिका-४ सरखण्डेमा भएको बस दुर्घटनामा घाइते भएका दुई जनाको मृत्यु भएको छ । उपचारका लागि समर्पित अस्पताल पुऱ्याइएका

खोटाङ (रासस) हङकङमा पत्रकारिता गर्दै आउनुभएका धरानका पत्रकार किसन राईको भिरबाट लडेर खोटाङमा मृत्यु भएको छ । धरान उपमहानगरपालिका–१५ घर

हिन्दूमाथि भइरहेको आक्रमणको विरोध गर्दै प्रर्दशन एचएस सिंह, राजविराज बंगलादेशमा अल्पसंख्यक हिन्दूमाथि भइरहेको आक्रमणको विरोधमा हिन्दू युवाहरूले सप्तरी सदरमुकाम राजविराजमा

बेपत्ता पारिएका व्यक्तिको छानबिन आयोगले द्वन्द्वपीडित भनेर जारी गरेको परिचयपत्र देखाएर सिंहदरबार प्रवेश गर्न पाइने भएको छ । गृह मन्त्रालयमा