पहिलो राष्ट्रपति बन्ने कोइरालाको प्रस्ताव लत्याएको पौडेलको खुलासा !

पहिलो राष्ट्रपति बन्ने कोइरालाको प्रस्ताव लत्याएको पौडेलको खुलासा !


नेपाली कांग्रेसका वरिष्ठ नेता रामचन्द्र पौडेलले लोकतान्त्रिक मूल्यमान्यताको रक्षाका लागि आफू मैदानबाट लडिरहने बताएका छन् । कांग्रेस जिल्ला कार्य समिति सिन्धुपाल्चोकले सोमबार चाबहिलमा आयोजना गरेको १४औँ महाधिवेशनमा नीति र नेतृत्वविषयक विचार विशेष कार्यक्रममा उनले पूर्वसभापति गिरिजाप्रसाद कोइरालाले आफूलाई मुलुकको पहिलो राष्ट्रपति बन्न प्रस्ताव गर्दा लोकतन्त्रमाथिको खतरा अन्त्य नभएकाले आफू अझै मैदानबाट लड्ने जवाफ दिएको दाबी गरे ।

‘नेताबाटै लोकतन्त्रमाथि खतरा छ, जनता नेताको अन्धभक्त भए भने लोकतन्त्रका लागि दुर्भाग्य हुन्छ, मैले लोकतान्त्रिक मूल्य मान्यताको रक्षाका लागि पछिल्लो आन्दोलन गृह जिल्ला तनहुँस्थित दमौली पुलबाट शुरु गरेको छु, लोकतान्त्रीकरण नभएसम्म यो अभियान जारी रहन्छ’, पौडेलको भनाइ छ ।

पार्टीलाई अझै लोकतान्त्रीकरण गर्ने अभियानमा आफू लागेको उल्लेख गर्दै उनले आन्तरिक लोकतन्त्र फस्टाउन कमजोर पार्टीको बलियो नेता हुने प्रवृत्ति अन्त्य गरिनुपर्ने बताए । कमजोर पार्टीको बलियो नेता भए तानाशाह जन्मने भएकाले यसमा कार्यकर्ता पनि चनाखो हुनुपर्ने नेता पौडेलको सुझाव थियो ।

पार्टीको १४ औँ महाधिवेशनका क्रममा क्रियाशील सदस्यता वितरणमा धाँधली गरिएको आरोप लगाउँदै उनले दादागिरी गरेर निष्ठावान् कार्यकर्तालाई पन्छाउन खोजिएको, डडेल्धुरामा पार्टी जिल्ला समितिलाई एकातिर राखेर प्रहरी प्रशासनको बलमा वडा अधिवेशन गरिएको औंल्याउँदै पार्टीका लागि दुर्भाग्य नबनोस् भनी चेतावनी दिए । आगामी महाधिवेशनले पार्टीलाई लोकतान्त्रीकरण गरेर रुपान्तरण गर्न नेता तथा कार्यकर्ताको भूमिका महत्वपूर्ण हुने उनको भनाइ थियो ।

file photo