सर्वदलीय बैठकमा एमाले सरिक नहुने
एमालेमाथि पक्षपातपूर्ण व्यवहार गरेको आरोप खेपेका सभामुख अग्नि सापकोटाद्वारा बोलाइएको सर्वदलीय बैठक संसदको विपक्षी दल एमालेले बहिष्कार गर्ने भएको छ । आज दिउँसोको लागि बोलाइएको बैठकमा आफ्नो पार्टी सहभागी नहुने एमालेका सचेतक विशाल भट्टराईले सभामुख सापकोटालाई फोन गरेर जानकारी दिएका हुन् ।
कारवाहीमा परेका चौध सांसदको पद रिक्त भएको सूचना टाँस्न सभामुखलाई आग्रह गरेको, सो नभए सभामुख पदबाट राजीनामा दिन सचेतक भट्टराईको भनाइ छ । तर, टेलिफोन गरेर सो आग्रह गर्दा सभामुखले कुनै जवाफ नदिइ फोन राखेको उनको भनाइ छ । सभामुखको कारण यो अवस्था आएकोले उनले एमालेसँग नै छलफल गर्नुपर्नेमा सर्वदलीय बैठक बोलाएर अटपटे व्यवहार प्रदर्शन गरेको एमालेको तर्क छ । सभामुखले विवाद मिलाउन नै खोजेको हो भने आफ्नो पार्टीका अध्यक्षसँग कुरा गर्ने हिम्मत दर्शाउनुपर्ने धारणा सचेतक भट्टराइले राखेका छन् ।
प्रतिक्रिया