१३ श्रावण २०७८, बुधबार

पोखरा रङ्गशालामा खेलकूद प्रशिक्षण शुरु

  प्रकाशित मिति
२ श्रावण २०७८, शनिबार ०२:३९


कोरोना भाइरस सङ्क्रमणको दोस्रो लहर नियन्त्रणका लागि लागू गरिएको निषेधाज्ञाका कारण रोकिएको खेलकूद अभ्यास र प्रशिक्षण पोखरामा शुक्रबारदेखि शुरु भएको छ । यसै वर्ष गण्डकी प्रदेशमा तय गरिएको नवौँ राष्ट्रिय खेलकूद तथा अन्तरराष्ट्रिय प्रतियोगितालाई लक्ष्य गरी प्रशासनको अनुमतिमा आंशिकरूपमा खेलकूद अभ्यास तथा प्रशिक्षण शुरु गरिएको हो ।

जिल्ला खेलकूद विकास समितिका अध्यक्ष तोरणबहादुर बानियाँका अनुसार सम्बन्धित खेल सङ्घले उपलब्ध गराएको खेलाडीको नामावलीका आधारमा सिफ्ट विभाजन गरेर एक सिफ्टमा ६ देखि १२ जना खेलाडीको प्रशिक्षण गरिने छ । ‘इनडोर’ खेलका अभ्यास साँझ र बिहानमात्र सञ्चालन हुनेछन् । प्रारम्भमा क्रिकेट, लनटेनिस र मार्सल आर्टस्का प्रशिक्षण शुरु भएको र स्थिति सहज भएको खण्डमा भदौदेखि नै सबै खेलका प्रशिक्षण शुरु गर्ने तयारी गरिएको बताइन्छ ।

अध्यक्ष बानियाँले भने– ‘लामो सयम खेलकूद गतिविधि ठप्प हुँदा खेलाडीको प्रतिभा गुम्ने र उनीहरूमा निराशा उत्पन्न हुने भएकाले आंशिकरूपमा अभ्यास तथा प्रशिक्षण शुरुआत गरेका छौँ, गण्डकी प्रदेशको मुख्य प्रशिक्षणस्थल पोखरा रङ्गशालामा सरकारले तोकेको स्वास्थ्य मापदण्ड कडाईका साथ पालना गर्ने गरी प्रशिक्षण सञ्चालन गर्नेछौँ ।’

गत वैशाख पहिलो सातादेखि पोखरामा सबै प्रकारका खेलकूद गतिविधि रोकिएका छन् । कोरोनाको दोस्रो लहर रोक्न वैशाख १६ देखि निषेधाज्ञा जारी गरेपछि रङ्गशाला पूर्ण रूपमा बन्द भएको थियो ।

आसन्न नवौँ राष्ट्रिय खेलकूदको तयारीका लागि प्रशिक्षण शुरु गर्नुपर्ने भएकाले महानगर खेलकूद परिषद्, जिल्ला खेलकूद विकास समिति, प्रदेश खेलकूद परिषद् र राष्ट्रिय खेलकूद परिषद्का प्रतिनिधिसहितको छलफलले अभ्यास शुरु गर्न प्रशासनसँग आग्रह गर्ने निर्णय गरेको थियो । सोहीअनुसार असार ३१ गते कास्कीका प्रमुख जिल्ला अधिकारीले मापदण्ड पालना गर्ने गरी प्रशिक्षणका लागि अनुमति प्रदान गर्नुभएको बताइन्छ ।

गण्डकी प्रदेशमा नवौँ राष्ट्रिय खेलकूद प्रतियोगिता सञ्चालन गर्ने निर्णय तीन वर्षअघि नै भएको थियो । अघिल्लो वर्ष तय भए पनि कोरोनाका कारण निर्धारित समयमा सम्पन्न हुन नसकेपछि राष्ट्रिय खेलकूद परिषद् (राखेप)ले यस वर्ष राष्ट्रिय खेलकूद आयोजनाको तयारी गरेको छ । प्रतियोगितामा गण्डकीका ११ वटै जिल्लामा कम्तिमा एक खेल आयोजना हुने बताइन्छ ।



प्रतिक्रिया दिनुहोस !
सम्बन्धित खबरहरु

जापानको राजधानी टोकियोमा जारी ३२औँ ग्रीष्मकालीन ओलम्पिक खेलकूदमा आयोजक जापान पदक तालिकाको शीर्ष स्थानमा उक्लेको छ । अमेरिका र चीनलाई

डम्बर निदाल, डडेल्धुरा रंगुन खोलामा पुल नहुँदा स्थानीयलाई सास्ती हुने गरेको छ । डडेल्धुरा जिल्लाको भित्रीमधेश क्षेत्रको आलिताल परशुराम भएर

नेपालमा मंगलबार ३,८९९ जनामा कोरोना संक्रमण पुष्टि भएको छ । १२,६५५ पीसीआर परीक्षण गर्दा २,७२६ जना र ४,८६३ एन्टिजेन परीक्षण

अफगानिस्तानको उत्तरी प्रान्त तखारको प्रान्तीय राजधानी तालुकान शहरमा तालिबान लडाकूले गरेको आक्रमण विफल भएको छ । ती लडाकूहरु सो शहर