देशभरिका अस्पतालमा अक्सिजन अभाव भइ हाहाकार मच्चएपछि नेपाली काङ्ग्रेसका महामन्त्री पूर्णबहादुर खड्काले कोरोना महामारीबाट नागरिकको जीवनरक्षा गर्न सबै राजनीतिक दलहरू एकताबद्ध हुनुपर्ने धारणा अघिसार्नुभएको छ ।

एक वक्तव्य जारी गर्दै महामन्त्री खड्काले अक्सिजन अभावका कारण नागरिकले अकालमा ज्यान गुमाउनुका साथै बिरामीको उपचारमा कठिनाइ परेकोप्रति सङ्घीय सरकार र विशेषगरी कर्णाली प्रदेश सरकारको ध्यानाकर्षण गराउनुभएको छ ।

वक्तव्यमा महामन्त्री खड्काले भन्नुभएको छ- ‘देशभरिका अस्पतालका अलावा कर्णाली प्रदेश अस्पतालका साथै अन्य जिल्ला अस्पतालहरूमा पनि अक्सिजन अभावले नागरिकले ज्यान गुमाउनुपरेको छ । बिरामीको उपचारमा परेको कठिनाइप्रति सङ्घीय सरकार र कर्णाली प्रदेश सरकारको गम्भीर ध्यानाकर्षण गराउँदछु । एक वर्षअघिको कोरोना महामारीको प्रकोपपश्चात् विज्ञहरूद्वारा कोरोनाको दोस्रो लहर आउन सक्ने भनी दिइएको सुझाव र सचेतनालाई हल्का रूपमा लिइ पर्याप्त समय हुँदाहुँदै अस्पतालमा बेड, अक्सिजन र भेन्टिलेटरको प्रबन्ध नगर्नु सङ्घीय र प्रदेश सरकारको चरम लापर्वाही हो, जसका कारण नागरिकको जीवन दिन-प्रतिदिन असुरक्षित हुँदैछ ।’

सबैले गल्ती-कमजोरी सच्याउँदै जिम्मेवारी बोध गरेर समय छँदै एकताबद्ध भइ महामारीविरुद्ध अघि बढ्न पनि उहाँले आग्रह गर्नुभएको छ ।

आफ्नो वक्तव्यमा महामन्त्री खड्काले कर्णाली प्रदेश अस्पतालमा केही समय भएको अक्सिजन अभावलाई सुर्खेतका प्रमुख जिल्ला अधिकारी र कर्णाली प्रदेश अस्पतालको समन्वयका साथै सबै तरिकाको प्रयत्नबाट रातारात नेपालगञ्जदेखि अक्सिजन आपूर्ति शुरु भएकोले स्थिति भयावह हुनबाट केही कमी आएको पनि उल्लेख गर्नुभएको छ । कोरोनाबाट नागरिकको जीवन रक्षा गर्न सबै राजनीतिक दलहरू एकताबद्ध हुन र नागरिक तहले पनि आफू बच्दै अरुलाई बचाउन उहाँले आग्रह गर्नुभएको छ ।