- सुरेश परियार, बुटवल
रुपन्देहीको तिलोत्तमा नगरपालिकाका मेयर तथा उपमेयर चढ्ने गरेको गाडीलाई एम्बुलेन्सको रुपमा प्रयोग गरिने भएको छ । मेयर बासुदेव घिमिरेले लु १ झ ३६० नम्बरको र उपमेयर जगेश्वरीदेवी चौधरीले ३२६ नम्बरको स्कार्पियो गाडीलाई एम्बुलेन्सको रुपमा प्रयोग गर्ने निर्णय गरेका हुन् ।
नगरपालिकाभित्र दिन–प्रतिदिन कोरोना संक्रमितको संख्या थपिँदै जाँदा संक्रमितलाई उपचारको लागि अस्पताल लैजान एम्बुलेन्सको अभाव हुन थालेपछि यस्तो निर्णय गरिएको बताइएको छ ।
‘नागरिकहरु एम्बुलेन्स नपाएर घरमै छट्पटाइरहँदा उहाँहरुकै करबाट किनिएको सरकारी गाडी चढेर हिँड्न हामीलाई नैतिकताले दिएन,’ मेयर बासुदेव घिमिरेले भनेका छन् । उक्त गाडीमा सिट र अक्सिजन सिलिण्डर व्यवस्थापन भइरहेको र आजदेखि नै एम्बुलेन्सको रुपमा प्रयोगमा ल्याइने उनले जानकारी दिए ।
साथै, नगरपालिकाले यसअघि वडा नम्बर १ शंकरनगर बनबाटिकामा रहेको स्वास्थ्यचौकीलाई अन्यत्र व्यवस्थापन गरेर अक्सिजनसहितको आइसोलेसन अस्पतालको रुपमा सञ्चालनमा ल्याइसकेको छ। दैनिक करिव दुई सय जनासम्म संक्रमित थपिँदै गइरहेको तिलोत्तमामा रुपन्देहीको बुटवल उपमहानगरपछि सबैभन्दा धेरै संक्रमित छन्।
प्रतिक्रिया