प्रधानमन्त्री केपी शर्मा ओलीले वैशाख २७ गते संसदमा विश्वासको मत लिनुहुने भएपछि माधव नेपाल पक्ष थप धर्मसङ्कटमा परेको छ। विश्वासको मत नदिँदा सांसद पद जाने र दिँदा राजनीतिक हैसियत र अहिलेसम्म लिइँदै आएको अडान थला पर्ने हुनाले नेपाल सङ्कटमा परेका हुन् ।
नेकपा एमालेले संदिग्ध २७ सांसदसँग गत साता स्पष्टिकरण मागेकोमा सबैजसोले स्पष्टिकरण बुझाइसकेका छन् । सत्ताइसमध्ये सात समानुपातिक र २० जना प्रत्यक्ष निर्वाचित छन् । माओवादी र काङ्ग्रेसले अविश्वासको प्रस्ताव ल्याएमा फ्लोर क्रस गर्ने र ओलीलाई बिस्थापित गर्न निर्णायक सहयोग पुर्याउने गुप्त योजनामा रहेको माधव नेपाल पक्ष त्यसअघि नै विश्वासको मतबारे निर्णय दिनुपर्ने भएकोले सकसमा परेका छन् ।
पार्टी ह्वीप नमान्नेबित्तिकै त्यस्ता सांसदलाई पार्टीबाट निष्कासन गरी समानुपातिक सात जनाको ठाउँमा तत्काल अन्यको मनोनयन हुनेछ । त्यसैले कारबाही भोग्नुअगावै सामुहिक राजीनामा दिएर राजनीति बचाउने या अहिले विश्वासको मत दिएर पद जोगाउने र अविश्वासको प्रस्ताव आएपछि फ्लोर क्रस गर्ने भन्ने विकल्पमा उनीहरूबीच गुप्त छलफल चलिरहेको बुझिएको छ ।
अधिकाङ्श सांसद सामूहिक राजीनामाको पक्षमा भएको बताइन्छ । विश्वासको मत दिनुभन्दा केही समयअघि मात्र राजीनामा दिने सोच बनाइएको एक सूत्रले जनाएको छ । यसरी राजीनामा दिनेको सङ्ख्या १३ देखि बढीमा २० सम्म हुन सक्ने सम्भावना छ । बीस जनाले राजीनामा दिएमा एमालेको कुल १२१ सांसद सङ्ख्या घटेर १०१ मा सीमित हुनेछ ।
हाल प्रतिनिधिसभाका २७५ मध्ये चार जनालाई माओवादीले पदमूक्त गरिदिएपछि २७१ सङ्ख्या कायम भएको छ । त्यसमध्ये काङ्ग्रेस ६१, माओवादी ४८ र उपेन्द्र यादव पक्षका १२ सांसद सरकारको विरूद्ध स्पष्ट देखिएका छन् । महन्थ ठाकुरको पक्षमा सत्रदेखि २३ सांसद रहने विश्वास गरिएको छ। माधव पक्षका बीसै जनाले राजिनामा दिएको अवस्थामा सरकार गठन हुन १२७ सांसदको आवश्यकता रहन्छ, जुन सङ्ख्या पुर्याउन प्रचण्डलाई निकै कठिन छ । त्यसैले विश्वासको मत नपाए पनि संसदको ठूलो दलको नेताका हैसियतले केपी ओली नै पुनः प्रधानमन्त्री नियुक्त हुनसक्ने प्रबल सम्भावना छ । त्यसपछि विश्वासको मत पाएनन् भने केपीले संसद् विघटन गरेर ताजा जनादेश लिन सक्ने स्थिति उत्पन्न हुनेछ ।
प्रतिक्रिया