गैरआवसीय नेपाली सङ्घ (एनआरएनए)का अध्यक्ष कुमार पन्तले १० अर्ब पूँजी भएको एनआरएन डेभलपमेन्ट फन्डले पूर्वाधारको क्षेत्रमा लगानी गरिने बताएका छन् । उक्त रकमको प्रतिफल बैंकमा पैसा राखी व्याजबाट नभई पूर्वाधारमा लगानी गरेरै दिने उनले स्पष्ट पारेका छन् ।

नेपाल आर्थिक पत्रकार सङ्घ (नाफिज) ले आयोजना गरेको कार्यक्रममा अध्यक्ष पन्तले बैंकबाट व्याज खाएर नभई पूर्वाधारमै लगानी गरेर प्रतिफल निकाल्ने कोषको योजना रहेको उल्लेख गरे ।

पूर्वाधार तथा उत्पादनशीललगायतका क्षेत्रमा लगानी गर्ने गरी फन्डको स्थापना भएको जानकारी दिँदै उनले त्यसमा गैरआवासीय नेपालीको नौ अर्ब ५० करोड र नेपाल सरकारको रु ५० करोड शेयर लगानी हुनेछ ।

गैरआवासीय नेपालीलाई लक्षित गरी छिट्टै कोषको प्राथमिक सेयर बिक्री गर्ने योजना छ । त्यसमा रु आठ बराबरको साधारण शेयर बिक्री गरिने बताइएको छ । नेपालको कृषि, पर्यटन र पूर्वाधारसँग सम्बन्धित परियोजना भित्र्याउने तयारी गरिएको छ ।

त्यसमा नेपाल सरकारले पाँच प्रतिशत, १५ प्रतिशत संस्थापक र बाँकी ८० प्रतिशत पूँजी साधारण सेयर विक्री गरी सङ्कलन गरिने छ । साधारण सेयर सार्क मुलुक बाहेकका गैरआवासीय नेपालीले मात्रै खरिद गर्न पाउने जनाइएको छ ।