३ बैशाख २०७८, शुक्रबार

पुत्रशोकबाट गुज्रिरहेकै अवस्थामा पूर्व प्रधानसेनापतिको प्राणान्त

  प्रकाशित मिति
२५ चैत्र २०७७, बुधबार १२:२२


नेपाली सेनाका पूर्व प्रधानसेनापति अर्जुन नरसिंह राणाको कोरोनाका कारण निधन भएको छ । वि.सं. २००८ मा शाही नेपाली सेनामा प्रवेश गर्नुभएका राणा २०४० जेठदेखि ०४४ सालसम्म प्रधानसेनापति हुनुभएको थियो । संयुक्त राष्ट्रसंघको शान्ति सेनामा भाग लिने पहिलो टोलीको कमाण्ड गर्नुभएका उहाँ पहिलो अब्जर्भर हुनुहुन्छ । शान्ति सेनामा नेपाली सेनाको इतिहास लेबनानबाट सुरु भएको हो । लेबनानपछि उहाँले सिनियर स्टाफ अफिसर भएर मध्यपूर्वको साइनाइमा नेपाली सेनाको नेतृत्व गर्नुभएको थियो ।

नेपाली सेनाको आधुनीकीरण गर्नमा महत्वपूर्ण भूमिका निर्वाह गर्नुभएका राणाले आफू प्रधानसेनापति हुँदा सेनाको मेकनाइज्ड कोर्सको सुरुवात गर्नुभएको थियो । वीरेन्द्र सैनिक अस्पतालको मास्टर प्लानर उहाँ नै हुनुहुन्थ्यो । सेनाले भोगचलन गर्दै आएको जग्गाको स्वामित्व उहाँकै पालामा तात्कालिन शाही नेपाली सेनामा ल्याइएको हो ।

राष्ट्रको केन्द्रीय सुरक्षा समितिको अध्यक्ष भएका उहाँले श्री ५ त्रिभुवनको पालामा करियर सुरु गरेर श्री ५ महेन्द्र, वीरेन्द्र र ज्ञानेन्द्रसँग काम गर्नुभएको थियो । गणतन्त्रपछि राजसंस्थाको अवसान हुँदा उहाँ शाही पाश्र्ववर्ती हुनुहुन्थ्यो । अमेरिकाबाट स्टाफ कलेज गर्ने पहिलो सैनिक अधिकारी अर्जुन नरसिंह राणा प्रधानसेनापतिबाट अवकाश पाएपछि पाकिस्तानका लागि राजदुत नियुक्त हुनुभएको थियो । दिवंगत राणाकी पत्नी कृसु राणाको तीन वर्षअघि र एक मात्र छोराको एक महिनाअघि निधन भएको थियो ।

पुत्रशोकबाट गुज्रिरहेकै अवस्थामा उहाँलाई असहज भएपछि सैनिक अस्पताल लगिएको थियो । एक महिनाअघिसम्म उहाँ आफै जिम तथा मर्निङ वाक लगायतका शारीरिक अभ्यास गर्नुहुन्थ्यो । संगीतमा विशेष रुचि राख्नुहुने उहाँ हिन्दी र नेपाली भाषाका गीत गाउनमा शौखिन हुनुहुन्थ्यो । नयाँ तथा पुराना लोकगीतदेखि आधुनिक र पप गीतसम्म उहाँलाई कण्ठ थिए । स्व. राणाका चार छोरी हुनुहुन्छ ।



प्रतिक्रिया दिनुहोस !
सम्बन्धित खबरहरु

कूल सङ्क्रमित सङ्ख्या २,८२,८९० देशभर शुक्रबार थप ९०० जनामा कोभिड-१९ को सङ्क्रमण पुष्टि भएको छ । स्वास्थ्य तथा जनसङ्ख्या मन्त्रालयकानुसार

कोभिड-१९ को बढ्दो सङ्क्रमणलाई मध्यनजर गरी राष्ट्रियसभाको दिगो विकास तथा सुशासन समितिले विद्यालयमा भौतिक उपस्थितिको सट्टा भर्चुअल माध्यमबाट पठनपाठन गराउने

जापान प्रतिनिधिबाट जापानको टोकियोस्थित शिन्जुकु वडामा बिहीबार एक कन्डमिनियम भवनको पार्किङ क्षेत्रमा फसेर चार जनाको मृत्यु भएको छ । केही

हेमशंकर सिंह, सप्तरी नेपाली कांग्रेसका केन्द्रिय सदस्य डा. शेखर कोइरालाले संसद अनिर्णयको बन्दी भएकाले सहमतिको सरकार र निर्वाचन नै वर्तमान