नेपाली कांग्रेसले बैतडीको डिलासैनीमा पार्टीको कार्यक्रम भइरहेकोे समयमा नेकपाको सत्तानिकट समूहबाट नियोजित रूपमा आक्रमण गरिएको भन्दै सो घटनाको निन्दा गरेको छ ।

पार्टीका केन्द्रीय सदस्यद्वय एनपी साउद र डा. डिला सङ्ग्रौला, कांग्रेस बैतडीका सभापति नरेन्द्रजङ्ग थापालगायत स्थानीय नेतृत्व एवं नेविसङ्घका पूर्वसभापति नैनसिंह महर सहभागी कार्यक्रममा ढुङ्गामुढा भएको कांग्रेसले जनाएको छ ।

कांग्रेस प्रवक्ता विश्वप्रकाश शर्माले विज्ञप्ति जारी गर्दै घटनामा परी पार्टीका केही साथी घाइते भएका र केही सवारी साधनमा तोडफोड गरिएको उल्लेख गरेका छन् । एक्कासी भएको आक्रमणपश्चात् पार्टीका तरुणहरूले तत्कालै प्रतिवाद गरेपछि कार्यक्रम सुचारू भएको कांग्रेसले जनाएको छ ।

प्रवक्ता शर्माले सत्तारूढ नेकपाको स्थानीय पार्टी पंक्तिमा उग्रवादी चरित्र भर्न केन्द्रीय नेतृत्वकै अभिव्यक्ति शैली र ब्यवहारले भूमिका खेलेको पार्टीको ठहर रहेको जनाउँदै यस्तो प्रवृत्ति परित्याग गर्न चेतावनी दिएका छन् । साथै, डिलासैनी घटनाका दोषीहरुलाई तत्काल पक्राउ गरेर कारवाही गर्न का०ग्रेसले सरकारसँग माग गरेको छ ।