भारत सरकारले नेपालको स्वास्थ्य सेवा तथा अग्रपंक्तिमा खटिएका कर्मचारीहरूको तत्काल आवश्यकताको लागि नेपाललाई भारतमा उत्पादित १० लाख भाइल कोभिड-१९ भ्याक्सिन उपहारस्वरुप प्रदान गरेको छ । उक्त खोप नेपाल सरकारको आग्रहमा उपलब्ध गराइएको बताइएको छ ।
यही माघ २ गते भारतको नयाँ दिल्लीमा दुई राष्ट्रका परराष्ट्रमन्त्रीको अध्यक्षतामा सम्पन्न भारत-नेपाल संयुक्त आयोगको छैटौं बैठकमा पनि यस सहकार्यबारे छलफल भएको थियो ।
उक्त खोप बिहीबार विमानस्थलमा आए लगत्तै नेपालका लागि भारतीय राजदूत विनय मोहन क्वात्रा र स्वास्थ्यमन्त्री हृदयेश त्रिपाठीले ग्रहण गर्नुभएको थियो । राजदूत क्वात्राले खोपको आगमनले कोभिड-१९ को अन्त्यको सुरुवात हुने आशा व्यक्त गर्दै भाइरसलाई परास्त गर्न नेपालका जनताले चालेका प्रयासमा भारत कटिबद्ध रहेको बताउनुभयो । यस्तै, स्वास्थ्यमन्त्री त्रिपाठीले दुवै देशमा एक साथै खोप वितरण गर्नका लागि नेपालमा पनि समयमै उपलब्ध गराइएको जानकारी गराउनुभयो ।
बिहीबार दिउँसो नै प्रधानमन्त्री कार्यलयमा आयोजित एक समारोहमा राजदूत क्वात्राले कोरोनाविरुद्धको खोपको १० लाख डोज प्रधानमन्त्री केपी शर्मा ओलीलाई औपचारिक रुपमा हस्तान्तरण गर्नुभएको थियो ।
उक्त अवसरमा सो खोप भारतका जनताले नेपालका जनतालाई उपहारस्वरुप उपलब्ध गराएको बताउँदै राजदूत क्वात्राले नेपालले अघिसारेको खोप अभियानका लागि शुभकामना व्यक्त गर्नुभयो ।
यसैगरी, प्रधानमन्त्री ओलीले कोभिड-१९ विरुद्धको खोप अनुदानस्वरुप उपलब्ध गराएकोमा भारतका प्रधानमन्त्रीलाई धन्यवाद दिँदै यस्ता उपहार सधैँ विशेष हुने र संकटको घडीमा उपहारको रुपमा खोप उपलब्ध गराउनुले पनि यसको थप महत्व रहेको उल्लेख गर्नुभयो ।
यसअघि भारतले खोप वितरण, खोप सम्बन्धि प्रशासनिक एवम् संचालनका पक्ष, कोल्ड चेन र सम्पर्क तथा तथ्यांक व्यवस्थापनका लागि मानव संसाधन तालिम दिएको थियो ।
नेपालमा यस्ता खोपको निःशुल्क वितरणले महामारीविरुद्ध मानवताको लडाइँलाई सघाउ पुर्याउन भारतको खोप उत्पादन तथा वितरण क्षमतालाई प्रयोग गर्ने भारतका प्रधानमन्त्री नरेन्द्र मोदीको प्रतिबद्धतालाई पूर्णता दिएको दातृपक्षको भनाइ छ । ‘छिमेकी पहिलो’ नीतिअनुरुप भारतले नेपाललाई उक्त सहयोग अघि बढाएको बताइएको छ ।
ज्ञातव्य छ, महामारीको सुरु भएयता भारतले नेपाललाई हाइड्रोक्लोरोक्वीन, आरटी पीसीआर परीक्षण किट, आइसीयु भेन्टिलेटर, रेमडेसिभिर औषधी र एम्बुलेन्स उपलब्ध गराई निरन्तर सहयोग गरिरहेको छ ।
प्रतिक्रिया