१० माघ २०७७, शनिबार

सङ्गीत र सिने-संसारसँग जोडिएका यी खानेपानी मन्त्री

  प्रकाशित मिति
११ पुष २०७७, शनिबार ०५:२७


  • राजन घिमिरे

शुक्रबार खानेपानी मन्त्रीको रूपमा जब मणि थापा नियुक्त गरिए, उनको मोबाइलमा बधाईका ओइरो लाग्यो, जसमध्ये अन्य क्षेत्रका व्यक्ति-व्यक्तित्वको तुलनामा कला जगतसँग जोडिएका पात्रहरूबाट प्राप्त बधाईको खात अग्लो थियो ।

कलाकर्मीका तर्फबाट सबैभन्दा पहिला कल गरेका थिए अभिनेता तथा निर्देशक नवल खड्काले । मणि थापालाई पछिल्लो चरणमा राजनीतिज्ञको रूपमा मात्र चिन्नेहरूले उनको साङ्गीतिक पाटोबारे जानकारी नराखेका हुन सक्छन् । त्यसमाथि नेपाली चलचित्र फाँटमा समेत कथाकार, गीतकार र संगीतकारको रूपमा उभ्याउने तथा ‘परिचय’ दिलाउने कार्यमा उनै नवलको महत्वपूर्ण भूमिका रहेको हेक्का कमैले राखेका हुन सक्छन् । त्यसो त, जनयुद्धकालीन समयमा मणिका गीत–संगीतले गाउँ-बस्ती ब्युँझाएको इतिहास मेट्न खोजेर मेटिँदैन ।

जनयुद्धकालीन समय-खण्डमा क्रान्ति, प्रगति र अग्रगमनका सन्देश प्रवाह गर्ने साङ्गीतिक सिर्जनादेखि नेपाली चलचित्रको ब्यावसायिक गीत-संगीतको फाँटसम्म उत्तिकै जमेका नवनियुक्त खानेपानी मन्त्री मणि थापाले नवल खड्काको दशगजा, भीम दत्त र काँडेतार चलचित्रमा गीत मात्र लेखेनन्, संगीत भरे र कथा पनि तयार पारे ।

फक्लिनको टापुबाट, युद्धको मैदानबाट
चिट्टी लेख्दैछु आमा
लड़ाइँको मैदानबाट…

भूमिगतकालमा मणिले सिर्जना गरेका यो गीत आज पनि उत्तिकै दमदार र सन्देशमूलक मानिन्छ ।

अरुण तरेर नाना
तमोर तरेर
आयौँ हामी पिरतीको
गाथा लिएर…

जनयुद्धको समयमा यो गीतले नेपाली जन-जनमा छोडेको छाप र पैदा गरेको तर्ङ्गको चर्चा जति गरे पनि थोरै हुन्छ । ‘उहाँ राजनीतिमा मात्र होइन, सृजनात्मक कार्यमा पनि उत्तिकै निपुर्ण र दक्ष सर्जक हुनुहुन्छ’- अभिनेता तथा निर्देशक नवल खड्का सम्झन्छन् ।

नवलद्वारा निर्मित दशगजा, भीमदत्त र काँडेतार गरेर तीन चलचित्रका गीत–संगीतको जिम्मेवारी पाएका थिए मणि थापाले । दशगजा र भीमदत्त रिलिज भैसकेका छन् भने काँडेतार रिलिज हुन बाँकी छ ।

फूल झैँ फुल्न मन लाग्यो
लहरामा झुल्न मन लाग्यो
इन्द्रेणीको रंग शीरमा
लाउन मन लाग्यो…

चलचित्र दशगजामा समेटिएको यो रोमान्टिक गीतका संगीतकर्मी पनि मणि थापा नै हुन् । युद्धको मैदानदेखि रोमान्टिक भाव पैदा गराउन सक्ने सृजनाका स्रष्टा हुन् नवनियुक्त खानेपानी मन्त्री मणि थापा । उनको सृजनाबाट लाखौँ श्रोताहरूले गीत संगीतको प्यास त मेटेका छन्, अब हेर्नु छ कि यी मन्त्रीको कार्यकालमा काकाकुल बनेका काठमाडौवासीले पानीको प्यास मेट्न पाउने हुन् कि होइनन् !



प्रतिक्रिया दिनुहोस !
सम्बन्धित खबरहरु

‘संसद् पुनःस्थापना पहिलो प्राथमिकता’ नेपाली कांग्रेसका महामन्त्री डा. शशाङ्क कोइरालाले मुलुकमा राजनीतिक अवस्था अस्थिर हुँदै गएकाले तोकिएको समयमा निर्वाचन हुने

लमजुङमा निर्माणाधीन २७ मेगावाट क्षमताको दोर्दीखोला जलविद्युत् आयोजनाले हालसम्म ९६ प्रतिशत निर्माण सम्पन्न गरेको छ । हिमालयन पावर पार्टनर लिमिटेड

कमल पराजुली, बेनिड्रोम (स्पेन) स्पेनको कोस्टाब्लान्का क्षेत्रमा बस्ने नेपाली समुदायमा केही दिनयता कोरोना सङ्क्रमण बढेको छ । यसअघि केही नेपालीमा

डम्बर निदाल, डडेल्धुरा कोरोना भाइरसको सङ्क्रमण फैलिन नदिन क्वारेन्टिनका लागि प्रयोग भएका डडेल्धुराका विद्यालयहरूमा करोडौँको भौतिक क्षति भएको छ ।