विशेष प्रतिनिधि, टोकियो (जापान)
जापानमा अध्ययनका लागि आएका ७८ जना नेपाली विद्यार्थीले जापानको आवासीय अनुमति गुमाएका छन् । उनीहरुले अध्ययनको बीचमा काम गर्नका लागि निर्धारित नियमको उल्लंघन गरेपछि बसोबास अनुमति रद्द गरिएको हो ।
ओकिनावाको जेएसएल जापानीज भाषा स्कुलमा अध्ययनरत ती विद्यार्थीले अब बसोवास अनुमति नवीकरण गर्न नपाउने भएका हुन् ।
स्कुलका अनुसार फुकुओका क्षेत्रीय अध्यागमन ब्यूरोको नाहा शाखाले ती विद्यार्थीहरुले ३ महिनाभित्र जापान छाड्नुपर्ने बताएको छ । यो स्कुलको १९८६ मा स्थापना भएपछि यसरी विद्यार्थीले बसोवास अनुमति गुमाएको पहिलो पटक भएको बताइएको छ ।
गत वर्षको जुलाइमा विद्यालयमा भर्ना भएका १४२ विद्यार्थीमध्ये ७८ जनाले अब बसोवास अनुमति नवीकरण गर्न पाउने छैनन् । ६ महिनाको लागि बसोबस अनुमति बढाउने सुविधा पनि उनीहरुले पाउने छैनन्, किनकि उनीहरुले वैधानिक रुपमा काम गर्न पाउने समयभन्दा बढी काम गरेको पाइएको छ । जापानमा अध्ययनका लागि गएका विदेशी विद्यार्थीले पार्ट टाइममा हप्तामा २८ घण्टासम्म मात्र काम गर्न पाउँछन् ।
स्कुलले सहजीकरण गर्ने
पीडित विद्यार्थीलाई स्कुलले सहयोग र सहजीकरण गरेको छ । भिसा रद्द भएकै दिनबाट स्कुलले कुनै शुल्क नलिने घोषणा गरेको छ भने लिएको शुल्कसमेत फिर्ता गर्ने भएको छ ।
साथै नेपाल फर्किंदा गर्नुपर्ने पीसीआर टेष्ट, फर्किने टिकट ओकिनावा-नारीता, नारीता-काठमाडौं र टोकियोमा बस्ने होटलको खर्च समेत स्कुलले ब्यहोर्ने भएको हो । भाषा टेस्ट (तोकुतेई गिनोउ)को प्रक्रियालगायत कुनै कारणले नेपाल फर्कन ढिलो हुनेहरूलाई होस्टेल शुल्क समेत नलिने स्कुलले बताएको छ ।
नेपालमै समेत सम्बन्धित विद्यायलको शाखा रहेको पनि स्कुल सञ्चालकले नेपालीलाई धेरै माया गर्ने र नेपालमा अन्य क्षेत्रमा पनि लगानी गर्न लागेको बताइन्छ । करिब ४५० विद्यार्थीको क्षमता रहेको यस स्कुलमा नेपालसहित चीन, अमेरिका, भियतनाम र श्रीलंकाका विद्यार्थी अध्ययन गर्दै आएका छन् ।
प्रतिक्रिया