प्रतीक्षा सुवेदी (खड्गी), अष्ट्रिया

सन् २०२० को नोबेल शान्ति पुरस्कार संयुक्त राष्ट्रसङ्घको विश्व खाद्य कार्यक्रमलाई दिने घोषणा गरिएको छ । विश्व खाद्य कार्यक्रम (डब्लुएफपी)ले विश्वभर द्वन्द्वग्रस्त क्षेत्रमा पुगी समस्यामा परेको समुदाय वा व्यक्तिको खाद्यान्न सङ्कट टार्न र द्वन्द्वग्रस्त क्षेत्रमा शान्ति स्थापनार्थ गरेको महत्वपूर्ण भूमिकाका लागि यस वर्षको नोबेल शान्ति पुरस्कार डब्लुएफपीलाई दिने निर्णय गरिएको पुरस्कार छनोट समितिले बताएको छ ।

उक्त पुरस्कारको राशि १० लाख अमेरिकी डलर रहेको छ । विश्व खाद्य कार्यक्रमले जनाएअनुसार उसले प्रत्येक वर्ष विश्वभरि ९.७ करोड मानिसलाई सहायता पुऱ्याउने गरेको छ ।

समितिले भनेको छ, ‘डब्लुएफपीको भोकमरीसँग जुझ्ने प्रयास, द्वन्द्वरत क्षेत्रमा शान्ति स्थापनार्थ गरिएका काम अर्थात् भोकमरीलाई युद्ध र द्वन्द्व अन्त्यको अस्त्रको रूपमा प्रयोग गर्न गरिएको योगदानका लागि उक्त संस्थालाई पुरस्कृत गरिएको हो ।’

गत वर्ष इथियोपियाका प्रधानमन्त्री आबी अहमद अलीले नोबेल शान्ति पुरस्कार पाएका थिए । यसअघि चिकित्साशास्त्र, भौतिकशास्त्र, रसायनशास्त्र र साहित्यका विजेताको नाम घोषणा भइसकेको छ ।

पुरस्कृत भएपछि डब्लुएफपीको ट्वीटरमा लेखिएको छ, ‘यो विश्वका लागि एक शक्तिशाली स्मरण हो कि शान्ति र भोकमरीको अन्त्य सँगसँगै हुनसक्छ ।’

पुरस्कार घोषणापछि नियमित प्रेस वार्तालापमा जेनेभास्थित संयुक्त राष्ट्र संघको पोडियमबाट प्रवक्ता टोमसन फिरीले उक्त जीतलाई संयुक्त राष्ट्र संघको लागि थप जिम्मेवार र गौरवपूर्ण बनाउने थप जिम्मेवारी थपिएको बताए । फिरीको भनाइ उद्धृत गर्दै सिन्ह्वाले जनाएअनुसार डब्ल्यूएफपी गतिविधिका एक सुन्दरता भनेको आज र भोलिको लागि खाना मात्र उपलब्ध गराउनु नभएर मानिसहरूलाई ज्ञानसहित भविष्यलाई धान्नको लागि सुसज्जित पनि गर्नु हो ।

जेनेभामा भर्खरै डब्ल्यूएफपीका प्रवक्ता बनेका र दक्षिण सुडानमा हालसालै नौ वर्षसम्म संगठनको लागि काम गरिसकेका फिरीले भनेका छन्, ‘थप हजारौँ किलोमिटर यात्रा गर्न विश्वभरि कति मानिसहरू समर्पित छन् डब्लुएफपी र यसको नेतृत्वले स्पस्ट बुझेको कुरा हो ।’ आगामी दिनमा डब्लुएफपीले थप जिम्मेवार बन्दै विश्व शान्तिका लागि काम गर्ने उनको भनाइ थियो ।

ज्ञातव्य छ, उत्तरी युरोपिय मुलुक स्विडेनका इन्जिनियर, केमिस्ट तथा उद्योगपति अल्फ्रेड नोबेलको नामबाट राखिएको यो पुरस्कारलाई हाल नोबेल कमिटी नामक एक फाउण्डेशनमार्फत प्रदान गरिँदै आएको छ भने नोबेल पुरस्कारलाई विश्वभरबाट विशेष महत्वका साथ हेरिने गरिन्छ ।

यस वर्षको पुरस्का आगामी डिसेम्बर १० तारिकका दिन नर्बेको राजधानी ओस्लोमा एक भब्य कार्यक्रमका बीच वितरण गरिने जनाइएको छ ।