कर्णाली प्रदेश प्रमुख गोविन्द कलौनीलाई कोरोना सङ्क्रमण

कर्णाली प्रदेश प्रमुख गोविन्द कलौनीलाई कोरोना सङ्क्रमण


कर्णाली प्रदेशका प्रमुख गोविन्दप्रसाद कलौनीलाई कोरोना सङ्क्रमण पुष्टि भएको छ । कर्णाली प्रदेश अस्पताल/पशुपक्षी रोग अन्वेषण प्रयोगशालामा पिसिआर परीक्षण गर्दा बिहीबार प्रदेश प्रमुख कलौनीलाइ कोरोना भाइरस सङ्क्रमण पुष्टि भएको हो ।

प्रदेश प्रमुखको निजी सचिवालयले बिहीबार प्रेस विज्ञप्तिमार्फत प्रदेश प्रमुख कलौनीलाई कोभिड–१९ को सङ्क्रमण देखिएको जनाएको छ ।

प्रदेश प्रमुखका स्वकीय सचिव चूडामणि कलौनीले प्रदेश प्रमुखको कार्यालयमा कार्यरत केही कर्मचारीमा कोभिड–१९ को लक्षण देखिएर परीक्षण गर्दा उनीहरुमा सङ्क्रमण पुष्टि भएपछि कन्ट्याक्ट ट्रेसिङअनुरुप प्रदेश प्रमुख कलौनीको पिसिआर परीक्षण गर्दा सङ्क्रमण देखिएको जानकारी दिए ।

प्रदेश प्रमुख कलौनी यतिबेला चिकित्सकको प्रत्यक्ष निगरानीमा होम आइसोलेशनमा रहेका र उनको स्वास्थ्य अवस्था सामान्य रहेको बताइएको छ । कलौनीका स्वकीय सचिवले जनाएअनुसार एक साता पहिले कार्यालयका एक जना कर्मचारीमा कोरोना सङ्क्रमण पुष्टि भएको थियो । ती कर्मचारीको सम्पर्कमा आएका पाँच जना कर्मचारीको ‘कन्ट्याक्ट ट्रेसिङ’ गर्दा थप तीन जनामा कोरोना सङ्क्रमण देखिएको बताइएको छ ।

यसैगरी, राष्ट्रिय पुननिर्माण प्राधिकरणका प्रमुख कार्यकारी अधिकृत सुशील ज्ञवालीलाई पनि कोरोना संक्रमण पुष्टि भएको छ । आफूलाई संक्रमण भएको उनले सामाजिक सञ्जालमार्फत जानकारी दिएका छन् ।