९ कार्तिक २०७७, आईतवार

एनआरएनए एसिया प्यासिफिक क्षेत्रको क्षेत्रीय भेला तथा विज्ञ सम्मेलनको उद्धघाटन

  प्रकाशित मिति
११ आश्विन २०७७, आईतवार १५:३८


डिल्ली अम्माई, बेल्जियम

गैरआवासीय नेपाली संघ एसिया प्यासिफिकको आठौँ क्षेत्रीय भेला तथा पहिलो विज्ञ सम्मेलनको औपचारिक उद्घाटन भएको छ । नेपाल सरकारका प्रवक्ता तथा परराष्ट्र मन्त्री प्रदिप ज्ञवालीले अनलाइन माध्यमबाट संघको भेलाको सम्बोधन गर्दै औपचारिक उद्घाटन गर्नुभयो ।

सो अवसरमा मन्त्री ज्ञवालीले नेपालको विकासमा गैरआवसीय नेपालीको योगदान अतुलनीय रहेको बताउँदै विदेशमा नेपालीले सिकेको ज्ञान, सिप र प्रविधि नेपालमा हस्तान्तरण गर्ने सुनौलो अवसर आएको बताउनुभयो । कोभिड १९ पछिको नेपालको अर्थतन्त्रलाई उकास्न नयाँ प्रविधिको माध्यमबाट मुलुकको सम्मृद्धि गर्नुपर्ने आवश्यकता रहेको बताउँदै मन्त्री ज्ञवालीले गैरआवासीय नेपालीले सिकेको ज्ञान, सिप हस्तान्तरणको खाँचो औंल्याउनुभयो ।

मन्त्री ज्ञवालीले कोभिड १९ को कारण विदेशमा अप्ठ्यारोमा परेका नेपालीलाई स्वदेश फिर्ता गर्ने कार्य तीव्र गतिमा भइरहेको जानकारी गराउँदै वर्तमान असहज परिस्थितिलाई अरु बेला जस्तै सहज रुपमा नलिन पनि आग्रह गर्नुभयो । विदेशबाट फर्काउने क्रममा केही कठिनाई भएको स्वीकार्दै मन्त्री ज्ञवालीले हाल असहज परिस्थिति भएकाले पनि सोचेजस्तो नहुन सक्छ भन्ने कुरा बुझिदिन आग्रह गर्नुभयो ।

तेस्रो मुलुकबाट झन्डै ३ लाख नेपाली स्वदेश फर्कन लागेको र अहिलेसम्म ७६ हजार बढी नेपालीलाई उद्धार गरिएको उहाँले बताउनुभयो । भारतबाट मात्र ५ लाख नेपाली स्वदेश फर्किएको र तेस्रो मुलुकसहित गरी करिव १० लाख वैदेशिक रोजगारीमा रहेका नेपाली स्वदेश फर्कन लागेकाले तत्काल १० लाख नेपालीलाई रोजगारी सिर्जना गर्नु अर्को चुनौती रहेको मन्त्री ज्ञवालीको भनाइ थियो ।

नेपालको आर्थिक सम्मृद्धिमा गैरआवासीय नेपालीको योगदान रहेकोले अब नेपालमा लगानी गरि रोजगारी सिर्जना गर्ने वातावरणमा सहयोग गरिदिन पनि उहाँको आग्रह रह्यो ।

कार्यक्रममा गैरआवासीय नेपाली संघका पूर्वअध्यक्ष तथा संरक्षक देवमान हिराचनले नेपालमा विदेशी तथा गैरआवासीय नेपालीहरु लगानी गर्न इच्छुक रहे पनि नेपालमा त्यो अवस्था नरहेको भन्दै सरकारलाई लगानी गर्ने वातावरण बनाइदिन आग्रह गर्नुभयो । पूर्वअध्यक्ष हिराचनले एनआरएनएको १७ वर्षे इतिहासलाई समीक्षा गर्नुपर्ने खाँचो औंल्याउँदै कुनै कार्यक्रम गर्न अब काठमाडौंमा करोडौँ खर्च गरेर आउनुपर्ने अवस्थाको अन्त्य भएको पनि बताउनुभयो ।

गैरआवासीय नेपाली संघका प्रमुख संरक्षक तथा पूर्वअध्यक्ष शेष घलेले गैरआवासीय नेपाली संघ राष्ट्रिय समन्वय परिषद्हरुले कोभिड १९को बेलामा एक कदम अगाडि बढेर सेवा गरिरहेको बताउनुभयो । प्रमुख संरक्षक घलेले एसिया प्रशान्त क्षेत्रबाट नेपालमा जुनसुकै बेला पनि सहयोग हुने गरेकोमा धन्यवाद दिनु भयो ।

अष्ट्रेलियाको भिक्टोरिया राज्य समन्वय परिषद्लाई यहाँको स्थानीय सरकारले १ लाख ५० हजार डलर आर्थिक सहयोग गरेको उदाहरण दिनुहुँदै आफू बसेको देशमा विश्वास दिलाउन सकेको खण्डमा स्थानीय सरकारबाट पनि सहयोग मिल्नेतर्फ ध्यान दिन घलेले आग्रह गर्नुभयो ।

गैरआवासीय नेपाली संघका अध्यक्ष कुमार पन्तले संघले प्रविधिलाई समय उपयोग गर्दै स्मार्ट एनआरएनको प्रोजेक्टलाई लागू गर्न लागिरहेको जानकारी गराउनुभयो । संघमा ब्यापक पुनःरसंरचनाको खाँचो रहेको महसुस गर्दै स्मार्ट एनआरएन प्रोजेक्ट अगाडि बढाइएको पनि अध्यक्ष पन्तले जानकारी गराउनुभयो ।

कोभिड १९ प्रभावित नेपालीहरुको लागि आइएलोबाट संघलाई १० करोड सहयोग प्रदान भएको जानकारी गराउनुहुँदै अहिले संघको सम्पूर्ण ध्यान विदेशमा रहेका नेपालीमा केन्द्रित रहेको उहाँको भनाइ थियो ।

त्यस्तै, अध्यक्ष पन्तले संघको विशेष महाधिवेशनको लागि परराष्ट्र मन्त्रालयमा निवेदन पेस गरेको जानकारी गराउनु हुँदै अनलाइन माध्यमबाट विशेष महाधिवेशन गर्ने अनुमति पाएपछि र विशेष महाधिवेशन सम्पन्न गरिने बताउनुभयो । यसरी नै उहाँले नेपालको आर्थिक सम्मृद्धिमा थप योगदान गर्न गैरआवासीय नेपालीहरु लागिपरेको जानकारी दिनुभयो ।

कार्यक्रममा म्यानमारका लागि नेपाली राजदूत भीम उदास, नेपाली कांग्रेसकी केन्द्रिय सदस्य तथा सांसद डा. डिला संग्रौलालगायतले विदेशमा नेपालीले सिकेको ज्ञान, सिप र प्रविधिको हस्तान्तरण गर्दै मुलुकको सम्मृद्धिमा लगाउनुपर्नेमा जोड दिनुका साथै कोभिडका कारण अझ अलपत्र परिरहेकाहरुलाई नेपाल फर्काउन नेपाल सरकारसंग आग्रह गर्नुभयो ।

आयोजक समितिका संयोजक तथा एसिया प्यासिफिक संयोजक गोविन्द श्रेष्ठ (रोविन्द)को सभापतित्वमा सम्पन्न कार्यक्रममा एनआरएनए एसिया प्यासिफिक उपसंयोजक द्वय पारसमणी पोखरेल र खगेन्द्र न्यौपानेले स्वागत तथा धन्यवाद ज्ञापन गर्नुभएको थियो । संचारकर्मी कृति भट्टराईले सञ्चालन गर्नुभएको कार्यक्रममा गैरआवासीय नेपाली संघका आइसिसी पदाधिकारीहरु, आइसीसी सदस्यहरु, आइसीसी सल्लाहकारहरु, पूर्व पदाधिकारी, आइसीसी सदस्यहरु तथा सल्लाहकारहरु, मानार्थ परिषदका सदस्यहरु एनसीसी अध्यक्ष तथा सदस्यहरुलगायत गैरआवासीय नेपाल अभियन्ताहरुको उपस्थिति रहेको थियो ।

घरफिर्ती, पुनःएकीकरण र रोजगारलाई सहज बनाउन जोड

गैर आवासीय नेपाली संघ एसिया प्यासिफिकको आठौं क्षेत्रीय भेला तथा पहिलो विज्ञ सम्मेलनको मूख्य शत्रका रुपमा ‘आप्रवासी नेपाली कामदार : स्वदेश फिर्ता, पुन एकीकरण र रोजगार’ का विषयमा सरकारी पक्ष, सम्बन्धित विषयका विज्ञ र गैरआवासीय नेपालीहरु बीच छलफल भएको छ ।

आप्रवासी कामदारको घर फिर्ती, पुनःएकीकरण र रोजगार सहज हुनु पर्ने सरोकारवालाको जोड छ । कोभिड १९ का कारणका नेपाली कामदारको रोजगार गुमेको हुँदा स्वदेशमा नै रोजगार सृजना गर्न एनआरएन र नेपाल सरकारबीच सहकार्य हुनु पर्ने बताइएको छ ।

कार्यक्रममा वैदेशिक रोजगार वोर्डका कार्यकारी निर्देशक राजन श्रेष्ठले विदेशमा रहेका नेपालीहरुको उद्धार तथा पुनएकीकरणका लागि सरकारले काम गरिरहेको बताउनुभयो । उहाँले विदेशमा समस्यामा परेका नेपालीलाई निशुल्क उद्धारका लागि पैसा पठाइसकिएको तर सरकारले मात्र स्वदेश फर्कन चाहने सबैलाई ल्याउन नसकिने बताउनुभयो । उहाँले भन्नुभयो– ‘सबै मिलेर अहिलेको समस्या समाधान गरौँ।’

कार्यक्रममा संघीय सांसद तथा नेपाली कांग्रेस केन्द्रीय सदस्य डा. डिला संग्रौलाले आप्रवासी कामदारको पक्षमा सरकारले बेवास्ता गरेको बताउनुभयो । उहाँले भन्नुभयो– ‘पीडामा परेका नेपालीहरुको पक्षमा सरकारले वास्ता गरेको छैन, एनआरएनले प्राथमिकतामा राखेर काम गर्नु खुशीको विषय हो ।’

कार्यक्रममा राष्ट्रिय मानव अधिकार आयोगका सदस्य सुदीप पाठक, नेपाल सरकारका पूर्वसचिव तथा वैदेशिक रोजगार विज्ञ पूर्णचन्द्र भट्टराईले आप्रवासी कामदारको घर फिर्ती, पुनएकीकरण र रोजगार आजको मुल विषय भएकाले सरकारले ध्यान दिनुपर्ने बताउनुभयो ।

एनआरएनका उपाध्यक्ष तथा इम्प्लोइमेण्ट एण्ड वेलफेयर डिपार्टका सभापति डा. बद्री केसीले एनआरएन आफैले सहयोग जुटाएर उद्धार तथा सहायता गरिएको बताउनुभयो । उहााले वैदेशिक रोजगार कल्याणकारी कोषको रकम सदुपयोग हुननसकेकोमा दुःख व्यक्त गर्नुभयो ।

एनआरएन सचिव आरके शर्मा, सल्लाहकार द्वय टिबी कार्की र यमकुमार गुरुङ, पूर्वसचिव तथा प्रवत्ता डिबी क्षेत्रीले आप्रवासी नेपाली कामदारको पक्षमा सरकारले त्यति चासो नदिएको बताउनुभयो ।

एसिया प्यासिफिक उपसंयोजक खगेन्द्र न्यौपानेलेले विषय प्रवेश गराएर शुरु भएको कार्यक्रमको समापन एसिया प्यासिफिक संयोजक रोविन्दप्रसाद श्रेष्ठले गर्नुभएको थियो ।



प्रतिक्रिया दिनुहोस !
सम्बन्धित खबरहरु

आश्विन शुक्ल नवमीका दिनमा मनाइने महानवमी पर्व आज (९ कात्तिक) हर्षोल्लासका साथ दुर्गा भवानीको पूजा आराधना गरी बलि दिएर मनाइँदैछ

■ अनन्तश्री राजगुरु जगतगुरु वीरेन्द्र परम्हंश ज्योतिषाचार्य आजको पञ्चाङ्ग श्रीशाके १९४२ नेपाल सं. ११४० प्रमादी नामक सम्वत्सर शरद ऋतु वि.सं.२०७७

■ कोशिक नवराज अहिले चर्चामा रहेको शब्द हो क्लिनफिड । नेपालमा २०७४ मा ल्याएर पनि कार्यन्वयन हुन नसकेको तर हाल

विश्व स्वास्थ्य संगठनका महानिर्देशक टेड्रस आधनाम गेब्रेयसले आगामी महिनाहरुमा कोभिड १९ को समस्या थप बढ्ने चेतावनी दिएका छन् । उनले