नेपालमा पछिल्लो २४ घण्टामा १४९७ जना कोभिड संक्रमित थपिएका छन् । बिहीबार (८ असोज) थपिएकासहित नेपालमा कोरोना संक्रमिको कुल संख्या ६९,३०१ पुगेको स्वास्थ्य तथा जनसंख्या मन्त्रालयले जनााएको छ ।

मन्त्रालयका अनुसार काठमाडौं उपत्यकामा बिहिबार थप ७५५ जनामा कोरोना भाइरसको संक्रमण पुष्टि भएको छ । काठमाडौंका ६०९, ललितपुरका ९५ तथा भक्तपुरका ५१ जनामा संक्रमण पुष्टि भएको हो ।

पछिल्लो २४ घण्टामा देशभर १ हजार ४ सय ९७ जना कोरोना संक्रमित थपिएका छन् भने बिहीबार ४ सय ५७ जना कोरोना संक्रमित डिस्चार्ज भएका जानकारी दिइएको छ । हालसम्म डिस्चार्ज हुनेको संख्या ५० हजार ४ सय ११ पुगेको छ ।

पछिल्लो २४ घण्टामा थप ११ हजार ४ सय ४९ जनाको पीसीआर परीक्षण गरिएको र हाल देशभर संक्रिय संक्रमितको संख्या १८,४३७ रहेको छ ।

यस्तै, पछिल्लो २४ घण्टामा कोरोना संक्रमणको कारण थप १७ जनाको मृत्यु भएको छ । मृत्यु हुनेमा १२ पुरुष र ५ महिला रहेका छन् ।

मन्त्रालयका अनुसार मोरङकी ५५ वर्षीया महिला, झापाका ७८ वर्षीय पुरुष, सुनसरीकी ८१ वर्षीया महिला, धनुषाका ६८ र ७० वर्षीय पुरुष, रौतहटका ६५ वर्षीय पुरुष, भक्तपुरका ८४ वर्षीय पुरुष र ७३ वर्षीया महिला, काठमाडौंकी ८२ वर्षीया महिला तथा ७५, ८० र ७९ वर्षीय पुरुष, धादिङकी ३२ वर्षीया महिला, तनहुँका ३९ वर्षीय पुरुष, दाङका ३९ वर्षीय पुरुष, कपिलवस्तुका ५० वर्षीय पुरुष र नवलपरासीका ५५ वर्षीय पुरुषको कोरोनाबाट मृत्यु भएको स्वास्थ्य मन्त्रालयले जनाएको छ।

यससँगै नेपालमा कोरोनाबाट ज्यान गुमाउनेको संख्या ५५३ पुगेको छ।