भारतका पूर्वप्रधानमन्त्री अटल बिहारी वाजपेयीको सम्झनामा भारतीय सांस्कृतिक सम्बन्ध परिषद्ले आगामी आइतबार (१६ अगस्त) एक विशेष कार्यक्रम आयोजना गर्ने भएको छ । उक्त समारोहमा पूर्वप्रधानमन्त्री वाजपेयीको तस्बिर भारतीय सांस्कृतिक सम्बन्ध परिषद्को परिसरमा अनावरण गर्ने कार्यक्रम रहेको बताइएको छ ।

वाजपेयीका साथै राष्ट्र निर्माणका लागि उहाँले दिनुभएको योगदानलाई सम्झिँदै उहाँको दोस्रो पुण्यतिथिमा सो कार्यक्रमको आयोजना गर्न लागिएको परिषदले जनाएको छ ।

बताइएअनुसार मित्रराष्ट्र भारतका विदेश राज्यमन्त्री वी. मुरलीधरन र भारतीय सांस्कृतिक सम्बन्ध परिषद्का अध्यक्ष एवम् संसद सदस्य डा. विनय सहस्रबुद्धेको समुपस्थितिमा भारतका राष्ट्रपति रामनाथ कोविन्दद्वारा भर्चुअल मोडमा अटल बिहारी वाजपेयीको तस्बिरको अनावरण गर्दै सो कार्यक्रम सुरु गरिनेछ । राष्ट्रिय र अन्तर्राष्ट्रिय स्तरमा थुप्रै पुरस्कारद्वारा सम्मानित, स्वर्णपदक विजेता, मुम्बइका सुप्रसिद्ध चित्रकार वासुदेव कामतले वाजपेयीको सो क्यानभास तेल चित्र बनाएका हुन् ।

भारतमा आपत्कालीन अवस्थापछि बनेको जनता पार्टीको सरकारको विदेशमन्त्री रहँदा अटल बिहारी वाजपेयीले सन् १९७७ मार्चदेखि सन् १९७९ अगष्टसम्म भारतीय सांस्कृतिक सम्बन्ध परिषद्को पदेन अध्यक्षका रुपमा काम गर्नुभएको थियो । आफ्नो विदेशमन्त्री कार्यकालको क्रममा सन् १९७७ मा संयुक्त राष्ट्र संघको महासभामा वाजपेयीले हिन्दी भाषामा भाषण दिनुभएको थियो । यसरी हिन्दी भाषामा महासभामा बोल्ने उहाँ पहिलो व्यक्ति बन्न पुग्नुभयो ।

उहाँको सोच र मार्गदर्शनले गर्दा नै भारतीय सांस्कृतिक सम्बन्ध परिषद्लाई विश्वव्यापी रूपमा अघि बढ्न र फैलिन मद्दत गरेको विश्वास गरिन्छ । संसद सदस्यको रुपमा, विदेशमन्त्रीको रूपमा र अन्त्यमा प्रधानमन्त्रीको रुपमा अटल बिहारी वाजपेयीले भारतीय सांस्कृतिक सम्बन्ध परिषद्को क्रियाकलापमा विशिष्ट एवम् दीगो प्रभाव छोड्नुभएको छ ।

भारतको बाह्य सांस्कृतिक सम्बन्धसँग सम्बन्धित नीति तथा कार्यक्रमहरूको तर्जुमा एवम् कार्यान्वयनमा सक्रिय रुपमा सहभागी हुन, भारत र अन्य राष्ट्रबीच सांस्कृतिक सम्बन्ध र पारस्परिक समझदारी प्रवर्द्धन एवम् सुदृढ गर्न र अन्य विदेशी राष्ट्र र जनतासँगको सांस्कृतिक आदानप्रदानलाई प्रवर्द्धन गर्न सन् १९५० अप्रिल ९ मा भारतीय सांस्कृतिक सम्बन्ध परिषद्को स्थापना भएको हो ।

परिषद्का कार्यक्रमलाई विश्वव्यापी रुपमा कार्यान्वयन गर्नका लागि भारतको विभिन्न राज्यमा १९ वटा क्षेत्रीय कार्यालय तथा विदेशमा ३८ वटा सांस्कृतिक केन्द्रहरू रहेका छन् । विगत केही वर्षमा परिषदको आकार र गतिविधिहरूमा वृद्धि भएको छ र भारतको नरम नीति विस्तार गर्न भारतीय विदेश मन्त्रालयको प्रमुख अङ्गको रुपमा रहेको बताइन्छ ।