अविरल वर्षाको कारण सिन्धुपाल्चोकको जुगल गाउँपालिका–२ लिदिमा आज (३० साउन) बिहान ६ बजे भीषण पहिरो गएको छ । लिदी गाउँका २० भन्दा ज्यादा घर पुरिएको र थप केही घर जोखिममा रहेको बताइएको छ ।

लामाहरुको बसोबास रहेको गाउँ पहिरोले पुरिँदा १३ वटा घरमा पूरै क्षति भएको र १५ जना घाइतेहरु पुरिएको स्थानबाट आफैं निस्किएको गाउँपालिका उपाध्यक्ष श्रीजना तामाङले जानकारी गराएकी छन् ।

उद्धार गर्न जान सक्ने अवस्था नरहेको, पुरिएका पाँच घरका सबै सम्पर्कविहीन रहेको र कति जना पुरिए भन्ने अझै खुल्न बाँकी रहेको स्थानीय आशबहादुर तामाङलाई उद्धृत गर्दै राससले जानकारी दिएको छ ।

सिन्धुपाल्चोकका प्रमुख जिल्ला अधिकारी उमेशकुमार ढकालले घटनास्थलमा सेना र प्रहरीलाई पठाएको जानकारी दिएका छन् ।